Ya se “Revenir de muevo sovre el sujeto DSK es suseptivle de enfasyar los lektores” lo ke entyendo byen, ma ay kontinualmente tantos trokamyentos.
Aktualmente este kavzo parese salir de la esfera personal de un ombre inkulpado sin motivos tanjibles, i parese desbordar sovre el espasyo komunitaryo de orijen Afrikano de los Estados Unidos.
Se vido la eroina del pretendido asalto, alta, muy byen formada i vestida, al pareser muy enerjika i muy segura de lo ke eya disho o de lo ke le sugjeraron de dezir.
Malgrado el rezultado ke le es negativo de las enkuestas echas por los inspektores del Prokuror Jeneral el mizmo, eya reklama kon fuersa el enkarselamyento del pretendido agresor komo si kere diktar el kamino a segir, a una de las mas grandes instansyas de la Djustisya.
Eya afirma i repeta kontinualmente kon fuersa “kero ke este ombre sea enkarselado”, ay en estas palavras komo una vyeja rankor, un djenero de abominavle aborresimyente... Al pareser, eya inyora ke una aksyon juridika no es un akto de vengansa, ma un akto de verdadera Djustisya.
En desparte de esto, se ve komo un djenero de presyon kaji kolektiva de la parte de la populasyon de orijen afrikana ke kere azer impresyon sovre la opinyon publika i las otoridades djudisyales. Un Senator Preto afirma la inosensya i la pureza de la pretendida viktima antes ke sea pronunsyada kualkyera deklarasyon de la parte del Tribunal. A sus torno kuatro o sinko Institusyones afrikanas i feministas intervinyeron kon la mizma insistensya.
Ma en este momento asistimos a un muevo golpe de teatro, esta vez pozitivo para la Defensa. Segun lo ke mos ambezan las gazetas de la Prensa Turka komo Evropea, una manseva de 36/38 anyos nombrada “Marie Victorine M.” kon la kuala DSK tuvo una aventura de amor ay de esto 14 anyos, esta pronta a testimonyar en favor del inkulpado.
De kuero bruno, ija de una madra espanyola i de un padre orijinaryo del Kongo, aktualmente avokata diplomada sovre el “Derecho İnternasyonal”, instalada en los Estados Unidos, “Marie Victorine M.” se topa en este momento en la Suisa , ande se refujyo para fuir el asigo insesante del avokato de la akuzasyon “Kenneth Thompson”.
Ansi eya deklaro al djornalisto del magazin Helvetiko “L’İllustré” ke durante los 8/9 mezes ke turo su relasyon amoroza kon DSK , eya no konstato ninguna brutalidad de la parte del presedente prezidente del FMİ, i afirmo ke es muy septika konsernando una tentativa de agresyon seksual enverso la kamarera del Sofitel.
Eya dize:“Dominique no es el djenero de ombre ke brutaliza, el es un seduktor, el utiliza su fuersa de persuasyon natural, el save enkantar ma nunka forsar. So pronta a testimonyar a este sujeto.
