El artikolo de la semana pasada de muestro shefe editor İvo Molinas, entitolado “Kötülüğü içimize kim soktu?” mos pusha todos a pensar... su titolo a el solo es una kestyon ke de mas a mas devyene frekuente i sovre todo imperyoza...
Desgrasyadamente en esta epoka de intesa rapidez ande mos topamos, el individuo no tyene tyempo a konsakrar a la refleksyon... no tyene tyempo a djuzgar si lo ke melda es djusto o yerrado, si se topa delantre una realidad o delantre una iluzyon por no dezir una mentira.
Antes mizmo kel esprito humano realize en su totalidad un muevo konsepto, ke un otro lo dezmente o lo remplasa, Eske kedo tyempo al kestyonamyento interyor?
Solo delantre su lojika i su konsensya, el ser humano se syente desmamparado, ovligado a sigir (a su manera i a su ritmo) la idea del dia, pronto a trokar el dia sigyente, pushado perpetualmente por la nesesidad de aktuar a todo presyo, asigido por el ovligo de afirmarse i de partisipar a uno de los koryentes de ideas, kuala sea su valor verdadera.
Si, komo mo lo aze sentir İvo Molinas, “ke afito al ombre kreado para ser una kriansa pensante, responsavle de sus aktos?”
Por empesar, un dover sakro surje delantre los ombres de Syensya i de Sagasidad, ansi ke delantre todos los ke, kon sus eskritas, son suseptibles de krear koryentes no solo intelektuales ma tambyen afektivos en la masa kompakta (munchas vezes eterojena) de los meldadores de livros i diaryos o de los ferventes de Televizyon: “El dover de muncho pensar antes de adresarsen al puevlo”.
Me permeto a este efekto de repetar 3 chikos paragrafos de mi eskrita de la semana pasada sovre el dezestre ke se produzyo en Norvej:
“Por seguro ke delantre la ley juridika, ansi ke delantre la sosyedad, es el matador ke sera konsiderado komo el prinsipal i puede ser el solo responsable. Ma detras de el, ay tambyen la enorme responsabilidad de una monstruoza ensenyansa del “odyo del otro” ke se topa a la baza de munchas teorias absolutistas, las kualas pretenden ser las solas a posedar la Verdad.
Detras de el, ay la influensa imperativa, de un respekto syego enverso kreensas transmetidas de jenerasyon a jenerasyon, munchas vezes eskritas en tekstos de un pasado leshano ke munchos meldan en sus literalidad sin a ningun momento tener el kudyo de bushkar en ke konteksto sosyo-historiko eyos fueron eskritos.
En ke kreensa ke sea, mizmo en las ke mos paresen ser bazada sovre “una etika superyor o una ekuidad perfekta” el absolutizmo yeva en el, el premisyo de un impakto negativo sovre el esprito humano, al kual pokos pueden rezistir...I el perikolo se topa djustamente en este punto de fokalizasyon absoluta sovre una sola doktrina, sin la mas chika avyertura sovre otras valores, sin ningun kestyonamyento individual ni nigun dubyo, komo un djenero de refuzo otomatiko de kualkyer otra solusyon”.
No mos olvidaremos ke una palavra no es solo portadora de su sinyifikasyon propya, ma de todo lo ke eya puede provokar en el esprito de los otros...de todo lo ke eya puede despertar de vyejas rankores, vyejas inimistades, mizmo vyejos aborresimyentos
Una larga eskrita fue publikada, sinyada por el monstre de Olso en uno de los sistemas elektronikos aktuales, aksesivle a varias personas... komo se aze ke ningun de entre los ke tuvyeron konosensya no sintyo el drama ke estava en preparasyon?
Es ke este djenero de eskritas no son kontroladas por konsilyos de inspektores adekuados, psikologos. sosyologos o edukadores?...
Asta ande este instrumento, ekstraordinaryo en la perfeksyon de su teknisita va kedar manko de kontrol, libre de influensar una partida, mizmo si es minima, de la opinyon publika?
