Las mizmas manifestasyones de kontestasyon ke empesaron tres semanas antes kontinuan syempre, kon las mizmas revindikasyones, las mizmas keshas i la mizma perseveransya.
Segun lo ke mos dize la prensa, en munchas grandes sivdades de Israel, la revolta kontra el governo aktual empeso a tomar proporsyones kel payis no avia nunka visto ni komosido asta agora; ma (Bendicho el Dyo) sin ningun desbordamyento de violensa.
El solo objetivo de este kolosal arrekojimyento es unikamente la lucha kontra los presyos lokos de los apartamentos a alkilar, ansi ke de la komanya i otros produktos de nesesidad munchas vezes vital…
Si … se tomo la desizyon de fraguar sentros de moradas, en los mijores lugares de las grandes sivdades, ma de grande lukso, i nada para el chiko empyegado de la klasa medyana…nada para el ovrero, nada para el ke gana su pan a la sudor de su frente.
Munchos ke biven en las kolonias , komo tambyen munchos myembros del “Likud” i byen entendido de “Kadima” i del “partido sosyalisto” se aunaron al movimyento. Ansi, kontestatarios de diferentes partidos politikos azen parte de la masa kompakta i eterojena de los partisipantes …el buto no es de azer kaer el governo aktual ma de luchar kontra el sistema ekonomiko ultraliberal del payis i revendikar mas djustisya sosyal.
Si,es una realidad, la ekonomia del payis esta relativamente buena i el nivel de shomaje relativamente basho en raporto kon otros payizes, ma solo los rikos i los poderozos se aprovechan realmente de esta situasyon. Los impuestos son malorozamente muy bashos para las grandes ganansyas, lo ke rende difisil kualkyer mejoria del sistema de asistansya sosyal de la parte del governo.
Los kontestatarios lo dizen klaramente “lo ke keremos, no es la demisyon del governo de Netanyahou, ma simplemente una syerta igualidad en las kondisyones de vida”.
Segun lo ke mos ambeza “le journal du dimamche” de Fransya, este movimyento de protestasyon empeso 3 semanas antes de una manera muy estranya: “una manseva de 25 anyos nombrada ‘Daphni Leef’, de aparensya frajil, devino la heroina de un solevantamyento ke iva tomar proporsyones inesperadas.
Visto los presyos inaksesivles para un chiko budjeto, topandose sin morada ande avrigarse, Daphni Leef tuvo la idea de instalarse en una tenda (çadır) en una de las kalejas las mas luksyozas de Tel Aviv, afin de despertar el interes de los dirijentes i de la prensa eskrita i televizada.
Ansi, delantre la persistensya de dia en dia mas fuerte de las revendikasyones, el governo se topa, byen entendido, en el ovligo de asegurar una mas grande igualidad de derechos entre sus sivdadinos....Ke va ser su desizyon final?
Komo syempre, los dias avlaran.
