Vyernes la tadre tuve la okazyon de sigir a la televizyon Franseza, programa “C dans l’air”, la diskusyon de kuatro savyos sovre las konstelasyones selestas: las estreas, los meteoros, la multitud de planetas, mundos ande se topa puedeser kondisyones propisyas a la vida.
El debate fue largo, muy interesante en su variedad i sovre todo en la kualidad de los ke partisiparon. Devo konfesar ke personalmente fui muy impresyonada por la suma de sus saveduria i de sus deduksyones a partir de sinyos i simboles ke por seguro pasarian sin ser remarkados por kualkyer profano… i a mi dimensyon kestyones empesaron a asegir mi esprito.
Ke pudo ser la impresyon de los primeros ombres de la era humana delantre esta multitud de fenomenos luminozos, la noche, leshos sovre sus kavesas, en la oskuridad profunda de un mundo sin eksplikasyon?
Por seguro la kuryozidad, ma tambyen puede ser la esperansa de sinyos benefikos i protektores … esperansa ke dyo probablemente nasimyento a la astrolojia i sovre todo a las primeras kreensas relijyozas….
En una atmosfera de reziko perpetual i de espanto insesante, es posible kel primer ombre sintyo la nesesidad de liberarse de este terrivle temor ke todos sentimos delantre un futuro insertano, i muy probablemente el bushko los medyos de luchar.
Ma, a partir de kualo el bushko? el no tenia ninguna baza … el tuvo a bushkar a partir de nada, “ex nihilo” komo dezian los latinos…i malgrado esto, mostro el koraje i la voluntad de kontinuar su bushkidad.
Entonses, inevitavlemente una otra kestyon me vino al tino: “Eske los ombres de los primeros siglos eran igualmente intelijentes ke los del dyezimueven, venten o vente-i-unyem siglo?
Vimos Einstein kon su konsepto de la relatividad… Freud kon sus estudyos sovre la seksualidad … vimos Schopenhauer, Heideger, Sartre i munchos otros konosidos o deskonosidos, ke avyeron el kamino a munchas muevas persepsyones del mundo i de la humanidad i ansi a muevas teorias, las unas portadoras de komprensyon i vida, las otras de muerte i de sufriensa...
Es ke syempre puedemos afirmar kel ombre kontemporeano es mas intelijente kel de los primeros tyempos de la historya?
Por seguro kel ombre de muestra epoka tyene milenaryos de eksperyensas detras de el, ansi ke la suma de milyardas de refleksyones de sus antesedentes i por esta razon una rasyonalidad mas objektiva. Ma es ke su nivel intelektual i mental es mas alto kel de la primera persona, lakuala miles i miles anyos antes, formulo el dezeo de bushkar a entender?
