Antes dos semanas tuvimos la okazyon de asistir a la boda del ijo de mi prima kerida; ke bive en İsrael.
Aviya 13 anyos ke no me iva a este pais maraviyozo ke troko enteramente i ke se ermozeyo en todo modo punto de vista.
Kuando arivo el avion, tuve un sentimyento ke no se puede dar a entender, tanto estuve emosyonada.
No puide konoser i akodrarme nada, tanto se troko el pais. La teknolojiya, la medisina, el nivel de bivir, todo muy adelantado.
Apartamentos muevos, kaminos muevos i anchos entornados de rozas i arvoles multikolores, ke la persona no se puede imajinar komo estan bivos kon esta kalor de 40 grados. En kada paso parkos, vedruras todo muy ordenado.
Mizmo ke la populasyon esta syete milyones, la sirkulasyon de las arabas i de las personas kon un orden ekstraordinaryo. En el enterval de una semana ke pasi aya, no vide una polisia de trafiko, ni sinti un chuflete.
El dia de la boda; la demanyana mos fuimos kon mis primos a un kafe en Bat-Yam delantre la mar para azer el dezayuno i eliminar el eskarinyo ke tuvimos estos dos anyos ke no mos puidimos ver.
Estava una demanyanada yeno de nostaljia i emosyon. Despues mos fuimos al kuafor, los kaveyos, el makyaj i todo djusto. Verso las 18.30 todos vistidos de kolores diferentes, muy elegantes mos metimos al kamino para iyir a la boda.
La boda se izo en un salon en Yafo djusto en frente de la mar, un lugar kalmo i maraviyozo.
De una parte la echadura del sol (güneş batışı), de la otra parte la boz del imam de la meshkita, el panorama de los arvoles de pino, la kolor del syelo i de la mar; una atmosfera sakra....
El novyo vino a poko a poko kon la madre i el padre muy elegantes, el un pasha kon un chapeyo preto orijinal komo un artisto amerikano, suvyeron a la hupa i pasaron a sus lugares.
La novya kon kara riyendo, en medyo de su padre i de su madre arivo kon el fostan blanko bolando del ayre. Di ke paresiya a un pasharo.
El novyo la resivyo en dandole un beziko i le tapo el velo, i suvyeron a la teva.
El haham kon su boz de seda empeso a azer la orasyon, todos sintyendolo kon muncha atansyon i emosyon.
Kontinuando la orasyon, el haham envito al granpapa del novyo. Le dyo la kupa de vino para ke bendiga a sus inyetos Marina i Avi KALVO. Este modo lo onoraron al granpapa.
Munchos konosidos de diferente paises, famiya, amigos, mansevos, todos kontentes, riyendo, avlando i komyendo en el kokteyl.
La alegriya ke aviya estava koza de ver.
Despues abashimos al salon para komer. Un bufe yeno de karnes, gayinas, peshkados, salatas, i munchas kozas savrozas en abondensya.
Kuando empeso la muzika Marina i Avi salyeron en medyo i baylaron muy grasyozos.
Sus amigos i la djente estavan dando una felisitad i una atmosfera kayente.
Eyos ke tengan byen i mozos tambyen, orozos fina la fin.
Una semana yena de evenementos sentimentales.
Me rankontri kon una amiga de eskola de antes 40 anyos. Ya vos puedej imajinar; los bezos, abrasoz i yoroz ke tuvimos kuando mos renkontrimos!...
No eskapimos de avlar i de akodrarmos de los anyos pasados de muestra manseves, la kerensya i los dias ermozos ke pasimos endjuntos en la eskola.
Eya ya se izo granmama i ya tyene dos inyetos luzyos. Ke le bivan kon sanedad.
A parte vide a primas, primos, vizinos de antes munchos anyos, amigos. Vijiti lugares muevos.
Este viaje fue para mi un sonyo yeno de sentimyentos i de ermozuras.
