"En tyempos del SigundoTemplo (Bet A Mikdash), el 15 del mez de Av fue konsiderado komo una fyesta popular. En Tu Be Av, las muchachas de Israel, todas vestidas de blanko, se ivan a baylar en las vinyas. Naturalmente munchos angajamientos, espozoryos se realizavan en akel diya de fyesta, despues de los ermozos bayles...”.
El mez de Av es jeneralmente konsiderado komo peryoda de destruisyon i de luto. Ampesando del 17 Tamuz (taanit de Shiva Asar be Tamuz), asta el 9 de Av, tres semanas son diyas de dolyo. Las destruisyones del Primer Templo por los Babilonyanos i del Sigundo Templo por los Romanos akontesyeron en el 9 del mez de Av. Koensidensa trajika, i el termo fiksado por el “Dekreto d’Ekspulsyon” en 1492, eskapo en Tisha Be Av.
Av no es solamente un mez de dolyo. Asigun el artikolo “The Meaning of Tu Be AV”: (la sinyifikasyon de Tu BeAv) “Sej akontesimyentos pozitivos se realizaron en el 15 de Av, azyendolo diya de festividades en el kalendaryo Djudio”.
En este kurto artikolo es difisil de nombrar estos eventos. Aki, vo avlar solo de TU Be AV, la fyesta del Amor. Tengo diversas fuentes, manaderos sovre este diya. En mayoriya lo ke meldi es de un karakter mas o menos relijyozo. Por evitar algunos yerros, preferi referarme a syertas sitasyones.
La unika fyesta judia de los tyempos antiguos en el mez de Av, era el 15 del mez en el kual las muchachas de Yehuda saliyan a dansar en las vinyas. Los mansevos en edad de fondar famiya, bushkando espoza, saliyan tambyen kon la esperansa de topar una ...Rabbi Shimon Gamliel disho en la “Mishna”: “No uvo otros diyas tan buenos para Israel, komo el 15 de Av i “Yom Ha Kipurim”, en los kualos las jovenas de Yerushalayim saliyan kon vestidos emprestados para no averguensar a las ke no teniyan remedyos..”. Kere dezir, eyas vestiyan fostanes blankos ke no eran suyos, por no afishar sus kondisyones de ijas de famiyas poderozas.
Bueno, kualo sinyifika Tu Be AV, ke lo aze ekivalente de Yom Kippur? Muestros savyos dizen ke Yom Kippur simboliza la Nasyon Djudia pedronada por el pekado de aver adorado la Vakita de oro. Es el Diya ke, finalmente El Todo Poderozo acheto los argumentos de Moshe Rabenu por el pardon de su puevlo...El Diya, ke Moshe abasho de la montanya kon las muevas “Tavlas”... “No ay mas grande kontentes de ser pedronado por los pekados” dizen los savyos. “En Yom Kippur por el pekado de la vakita de oro, i en Tu Be Av, por el pekado de los 12 eskulkadores (ajanes) ke fueron investigar la tyerra de Kenaan.” (*)Es por esta razon ke Tu Be Av es ekivalente de Kippur.
En el kalendaryo Djudio, Tu Be Av , tradisyonalmente marka la fin del enverano i de las fyestas Djudias del anyo... Syendo el 15 del mez, es nochada de lunar, komo uzamos a dezir “ La Luna en kinze”. Una semana mas antes, Tisha Be Av mos izo akodrar muestra İstorya trajika. La luna en kinze de Av, es dicha simbolizar la transformasyon del dolyo en alegriya.
Desde los tyempos Biblikos el 15 de Av (oganyo el 15 de Agosto) fue selebrado komo fyesta de amor i kerensya. En Israel moderno, es una manera de “St. Valentine’s Day” (komo el diya de los enamorados el 14 de Febrero).Naturalmente Tu Be Av es muncho mas ansyano i se selebra kon mas “sobriedad”. En este diya se uza mandar a la kerida un buketo de trandafilas koloradas. A traverso el Pais, se organiza partis, se kanta pedasos romantikos. En desparte, para los Djudios, Tu Be Av es una data popular de angajamyentos, i proyektos de kazamyentos.
