La famiya es el nido (yuva) ke fondan la mujer i el ombre endjuntos. Eya se engrandese kon las kriyaturas, ermanos, ermanas, nonas, nonos, inyetos, tias i tios.
La famiya es un konsepto (kavram) sakro i la baza de la komunitad (toplum).
La manera de engrandeser i edukar es influente enriva de los chikos ke se forman kon las reglas (kural) de los paryentes. Kuando se engrandesen, kada uno i uno se komportan de una manera diferente.
Esto mos aze pena, porke mozotros los grandes dezeamos ke se komporten komo keremos.
En el dia ke estamos bivyendo esto es imposivle.
En esta epoka lo ke esta estruyendo las relasyones familyales; el kontakto kon los mansevos es la teknolojiya i la televizyon.
No ay avlar, diskutir, la boka no esta djugando, porke los mushos se pueden kansar!..
Los dedos estan djugando, pizando a las tushes del telefon i del kompyuter. Solo mesajes sms i mail. No ay oyir la boz del den frente.
Boka por ermozura....Todos somos ovligados de ambezarmos a utilizar todo lo muevo para pueder tener relasyones kon los ijos.
Komo de tyempo ke vinimos!...
Las relasyones entre los paryentes (akraba) se estan aminguando de dia en dia malorosamente.
Dingunos no esta puedyendo suportar al denfrente.
Ay un aleshamyento (kopukluk) entre los mansevos i las madres i los padres.
El lavoro, las oras de lavorar oy, esta kavzando un poko esta separasyon (ayrılık).
Las relasyones familyales de antes, oy se esta vyendo malorosamente, en los kazamyentos, funerales i los dias emportantes.
Mizmo en las fyestas; los grandes se estan iyindo a viajar para no penar en sus kazas.
Para todo se kere un esforso, una veluntad muy grande.
Kerer es azer, i reushir a arekojer todos los myembros de los paryentes en el doredor de una meza para kreyar la kayentura (sıcaklık) entre todos i pueder kontinuar las relasyones.
Esta fin de semana tuve a los ijos de mis primos de Fransya para pasar dos dias endjuntos en la kaza de la isla.
Komo de ermozo ke pasimos, todos endjuntos; mi marido, ijo, madre, tio, tia, primo, ermano, sovrino todos endjuntos, avlando, komyendo, riyendo i akodrando de lo vyejo, de los vizinos, de la kaza ke moravamos en Halki; (Heybeliada), i munchos otros detalyos nostaljikos.
Mozotros devemos de arekojer a los mansevos, i a los aedados para kontinuar las relasyones i no alesharmos unos kon los otros en este dor, para ke muestros ijos puedan azer un poko de lo ke vyeron en sus kazas.
Lo ke vyene en primero en estas relasyones es la solidaritad i el ayudo en todo modo de situasyon.
A mi idea; la famiya es un konsepto sakro ke no se puede komparar kon nada. En la baza de este konsepto ay la amistad, el respekto, la kerensya i la piadad. Los individuos (birey) de la famiya, partajamos muestras alegrias, mos atristamos endjuntos i bushkamos solusyones para las problemas. Todos mos ambezamos de muestra famiya, el respekto, la natura, i el kerer byen a las personas.
Nada en el mundo, no kale ke dezazga esta unyon, esta solidaritad.
La famiya tyene un rolo emportante para desvelopar la kreativitad de su ijo u ija.
En terminando kero dizir ke la famiya es; la valor la mas presyoza i la mas grande en la vida.
Kedavos syempre kon la luz de la kerensya i de la amistad de vuestras famiyas...
