Estamos vyendo en todos los magazenes, una furya de “soldos”. Portanto era dayinda en medyo de la sezon kuando empesaron. Antes saviyamos, solamente dos vezes al anyo se a z iyan soldos debasho el eslogano . de “Mevsim sonu indirimleri” (Soldos de fin de sezon). Agora se izo abitual de verlos en el korso de los 12 mezes kaji. Aktualmente, los rebashos alkansaron ariva de % 50, i en desparte de estos soldos inkreivles, ay i diversas reklamas. Seya en los jurnales, seya en la T.V, estamos vyendo ke, a tala karta de kredi estan azyendo 12 taksites, o a otra, 15 ets.. Siguro, en menester no ay duda ke vamos emplear o merkar. Ma, no una lokura, una freneziya de merkar, de gastar...
Estas vendidas kon taksit, me izo akodrar un sistema muy frekuente en mi chikes, lo ke yamavamos “semanadero”. İndikava la persona vendyendo kon fiado. En Turko se yama “veresiyeci” (fiador). Munchos de estos vendedores eran ambulantes. En jeneral, vendiyan ropas, blankeriya ets...İvan de kaza, en kaza, seya para vender, seya para arrekavdar. Los ke teniyan sus butikitas eran mas mazalozos, teniyan la posivilidad de prezentar mas muncho “çeşit”. Par konsekuensa mas grande kliantela.
Los yamavan semanaderos syendo ke era de semana, en semana, ke se pagavan. En esto, diferan de los versamyentos aktual ke se azen mez, por mez. Ya se ke este uzo se pratiko anchamente, i por una lunga peryoda. Puedo dezir ke kamino muy byen, asigun me esto akodrando. Ser fiador o semanero, era kaji una profesyon. No esto sigura de aver visto en la kaza de mi madre algun vendedor semejante. Ya se ke a mi padre no le plaziya merkar nada fiado. İ en desparte, el estava en la plasa de tekstil ande teniya munchos konosidos. La maale entera teniyan kuento avyerto en el bakal, o en el karnesero mozotros no... Era el prensipyo de mi famiya, un uzo ereditaryo!! al pareser, porke i yo en jeneral no prefero el fiado.
Kon tyempo, el sistema de “semanadero” desparesyo. En realidad, es difisil de dizir kuando. En analizando las razones de esta fin, yo arrivi a una konkluzyon, djusta o no, al lektor de komentar. Desde anyos, el semanador teniya una fidela, fiksa i ancha kliantela de muestra Komunidad. No se puede enyegar ke la mas grande parte de los klientes emigraron a Israel. Es un fakto ke los soldos son tambien una otra razon de la falita del sistema de fiador. Kon tyempo, uvo una sorte de trokamiento konsernando el “tipo de semanadero”. Se empeso a ver las “ Bohchadjıyas” ke se echavan el bogo (bohcha) al ombro, sirkulavan: “Hanımmm bohchadji geldiii, charşafchi geldiii!..En mayoriya vendiyan pedasos de ashugar, savanas, broderiyas ets... Devo dizir ke yo no las enkontri muy frekuente en las kazas de mis konosensyas..
Naturalmente ay otras razones mas teknikas o komo ke diga?? mas aktualas ke kavzaron la desperasyon del “fiador.” Por egzempyo, el uzo de la karta de kredi. En primero un poko retisentes, mos auzimos muy presto a este “instrumento” tan pratik ma tambyen sekanozo... Pushando la persona konsomar, a merkar afuera del limito... Gastar mas de lo ke se gana i muy frekuente estamos vyendo las konsekuensas dezastrozas. En Turko dizimos: “Ayağını yorganına göre uzat” (Alarga tu pye asigun la kolcha). Malorozamente la kolcha munchas vezes esta muy kurta.
Keridos amigos, no se ke grado vos entereso lo ke eskrivi oy. Esto admetyendo ke no es un artikolo, komo ke diga? muy entelektual. Ma, devesh admeter ke no es muy fasil en esta kalor , ni eskrivir, ni meldar un teksto muy seryozo. Oy, es un “moabet” ke izimos komo uzamos azer. Akodrandomos de syertos uzos de un pasado relativamente serkano. O, si preferash diremos ke “ La manseves se mantiene de suenyos, la vejes de rekuerdos...”
