La aktual Senatora Franseza Esther Benbassa de orijen Turka, nasida i kresida en Estambol, vyene de resivir la Lejyon de Honor, una de las mas grandes distinksyones Fransezas, verdadera atestasyon de su valor intelektual i de su esforso kontinual de kerer syempre kedar imparsyal en sus djuzgamyentos, kritikas o adezyones.
En el diskorso ke el pronunsyo a esta okazyon, el Jeopolitisyano Fransez Pascal Boniface (amigo ke eya eskojo para remeterle la dicha dekorasyon) mos dize ke:
El enkaminamyento de Esther Benbassa, nasida en una famiya modesta de la komunidad Djudia de Turkia, fue sovre todo el rezultado de la lucha ke eya mizma livro kon el solo apoyo de su voluntad individual i de su propya perseveransa, asta alkansar las mas altas esferas intelektuales; entre munchos otros puntos a los kualos eya ayego, fue de saver pasar de su simple estatuto de emigrada en Fransya (ke era el suyo al empesijo) al nivel de ser elijida Senatora.’’
En efekto, nada la aparejava espesyalmente a esta maraviyoza asensyon, ni el nivel kultural de su famiya de lakuala eya fue la primera diplomada de liseo, ni la situasyon ekonomika de su padre.
Es en Israel ande eya (ainda adolesente) emigro por unos kuantos anyos, ke Esther Benbassa obtuvo sus primeros diplomas universitaryos, lo ke le dyo la posibilidad de aparejar a su yegada en Fransya, su thezis de “doktorado de Universidad” i tambyen mas tadre de “doktorado de Estado” ke le dyo akseso al prestijyozo CNRS (Sentro Nasyonal de İnvestigasyones Syentifikas).
Este largo i intensivo enkaminamyento verso la briyante situasyon ke es aktualamente la suya, Esther Benbasa lo izo solamente kon su lavoro i su kudyo de la perfeksyon.
Eya fue syempre egzijente enverso si mizmo, lo ke le permetyo de reushir en sus esforsos, i lo mas admiravle es ke eya pudo alkansar este punto sin nunka trahisar sus aspirasyones ni ideales de manseves, en sigyendo syempre la mizma linea de integridad i de respekto de los otros.
Si, en desparte de su inkontestavle talento de eskritora i de historyana, Esther Benbasa izo syempre prova de una absoluta honestedad en la ekspresyon de sus refleksyones: eya kedo syempre muy atada a las altas valores del Djudaizmo ke son la bushkida de la verdad i los prinsipyos de ekuidad, sin por esto serrar los ojos delantre kualkyer falta.
A este propozito, Pascal Boniface mos dize ke un estudyo superfisyal de la Historya Hebraika puede pushar los djudyos a un komunitarizmo muy estrikto, por kontra una konosensya profundo (tal ke es el kavzo por Esther Benbassa) permete una vizyon universalista.
Eya prekoniza la toleransya ansi ke la nesesidad de komprensyon i de avyertura a los otros i ansi lucha kontra el antisemitizmo i el rasizmo.
