En el Limmud del Alhad pasado, la prezantasion en Judeo-Espanyol fue sovre kuatro mujeres judias eksepsionales ke markaron muestra istoria. Kada una de mozotros, reanimimos una de estas mujeres inolvidables, ke markaron diferentes epokas de la istoria judiya: (Çela Zakuto-Ester Kira, Dora Niyego-Anna Frank, Şeli Gaon-Golda Meir, Anna Eskenazi-Simon Veil).
Para no estar solo entre mujeres, le propozimos a muestro umoristiko amigo Selim İşman, de kolaborar kon mozotros. Selim İşman reanimo el famozo aktor Peter Falk (nombrado komo Komisario Kolombo).
Kon las teknikas muevas, las vistimientas i la muzika apropriada a kada epoka, debasho la administrasion de Anna Eskenazi, aparejimos una prezantasion de projeksion.
Los espektatores estuvieron muy kontentes de pasar una ora yena de plazer i de kultura.
Vos kero dar, el rezume de los dialoges ke aparejimos por estos personajes.
Ester Kira (Çela Zakuto)
Yo so Ester Kira. Kira en grego kere dizir “Hanum” Mujer’’. Mi famiya fuyeron a Estanbol, a Balat, de las krueldades i tiraniyas de los Espanyoles.?Tuve una grande ambision, enteligensia i ermozura. Esto me ayudo a ganar munchas paras i fuersa. Estuve kon la Sultana Hurrem, la Sultana Nurbanu i kon la Sultana Safiye en el palasio. Fui sekreterya i konsejera de todas las relasiones kon la Evropa.
Di emprestimo al Sultan i a los Vezires. La darphane estava en mis manos. Vendi djoyas, ropas, i trigo.
Fin 80 anyos tuve rikeza, poder i enfluensa grande . Ma a la fin, del selo, me kortaron la kavesa.
Anna Frank (Dora Niyego)
Resivi este livro de memoria el dıya de mı anıversarıo. Va kontar todos mis sekretos a este livro.
Las krızas estan vınyendo una detras de otra. Una lay de leyes solo por los judıos.
Me ambezı ke mos vamos a eskonder en la shirvane del bınyan ande mı padre lavorava. Kada dıya mos estan trayendo novelas trıstas.
Tengo munchos ıdeales. Si un diya salgo de akı, va azer kozas ermozas. Kuando estas sufrıensas vana eskapar, ı sı kedo daında judıos en el mundo, sı un dıya el mundo se olvıda de esto todo, estos judıos vana testımonıar a estas negreguras ı a estas matansınas.
Şeli Gaon (Golda Meir)
Yo Golda Meyerson; me konosen komo Golda Meir. Nasi en la Rusia. Emigrimos a la Amerika.
En el anyo 1921, mos desidimos de ir a Palestina, ke estava debasho la dominasyon de los inglezes. Mos enstalimos a un kibuts.
Diriji el buro de Yerushalayim de la Adjensia de los Judyos, ke estavan organizando la emigrasyon a la Palestina.
Kije i dezeyi ke mi puevlo tenga un pais, i por modo de esto, peni la vida entera.
En 14 mayo 1948, fui una de las 24 personas ke sinyaron la Deklarasyon de la İndependensya de İsrael.
Resivi el primer pasaporto İsraeliano para ir a la Amerika i pueder topar la moneda ke iva ayudar a fondar el estado judyo.
Kuando torni kon 50 milyon dolares, Ben Guryon kon orgolyo me disho: Un diya la istorya va eskrivir, ke un estado se fondo kon la ayuda de una mujer judiya ke arekojo una moneda grande.
Desde los anyos 49 a 56, fui Ministra del Lavoro. En 1956, fui Ministra del Eksterior. Teniya 72 anyos, i estava muy kansada. Mi buto no era de ser la Primera Ministra.
Para mi patria aksepti esta responsabilitad, i fin a la fin de mi misyon lavori de alma i korason.
Anna Eskenazi (Simone Veil)
Nasi en el anyo 1927 kon el nombre Simone Jacob.
Fui savlada de la Shoa. Entri a la politika franseza. En 1974, fui Ministra de Salud, en 1975, ize pasar por el Parlamento la ley ke se yama kon mi nombre. De 1979 fin 1982, fui la primera mujer prezidente del Parlamento Evropeyo. En los anyos 1978-2007, fui Ministra de Asuntos Sosiales i de Salud.
En 2010, segun una istatistika, me eskojeron komo la mujer preferada de los fransezes. En el mezmo anyo, por la primera vez en la estoria franseza, fui una mujer akseptada i onorada en la Akademia Franseza.
En mi kamino politiko, apoyi Nicolas Sarkozy komo Prezidente, me okupi de la entegrasion, i la emigrasion, luchi por meter en la Konstitusion, una ley kontra kontra la distenksion de la diversidad etnika.
En 2009, resivi la mas grande medalya militar. Resivi tambien la medalya de la Legion d’Honneur.
Mi livro otobiyografiko, Mi Vida, fue traduizado en kinze linguas.
Fui Prezidente de La Memoria de Shoa. Tomi el titulo de Doktora Honoris Causa, de las universidades de la Evropa, de los Estados Unidos, i de İsrael.
Selim İşman, kon la ayuda de muestros amigos i de Anna Eskenazi, izieron un filmo, ande İşman djugo el rolo de Komisario Kolombo, i solvo un asasinato en Estanbol, en Balat. El filmo umaristiko, kon los mimikos de Selim İşman, no les desho lados de riir a los espektatores.
Tuvimos grande plazer de aparejar una prezantasion en Judeo-Espanyol en el Limmud de este anyo. Estomos muy kontentes ke reushimos a atirar la atansion de muncha djente. Esperamos ke en el Limmud de kada anyo, se kontinuea dar lugar al Judeo-Espanyol, para ayudar a kontinuar esta ermoza lingua de muestros antesesores.
