La semana ultima tuvimos la okazyon de asistir al syeten festival de kultura: “LİMMUD” ke se organizo en la eskola djudiya Ulus Musevi Lisesi; i fue muy reushido en todo modo punto de vista.
Kada anyo por noche de shabat mos arekojen en la sinagoga de Ortaköy, unas 150 personas para komer i azer el kidush endjuntos.
Este anyo fue diferente. Los volontaryos envitaron a sus kazas. Mozotros el grupo de djudeo-espanyol ke tuvimos una prezantasyon, tuvimos la shans de estar envitados en la kaza de “Eda i Dr. Sinto Levi”.
Mos resivyeron de una manera perfekta, kon kara riyendo, la meza ordenada, las komidas maraviyozas.
El Dr. Sinto kon su boz de seda disho el kidush, i mozotros las kinze personas ke estavamos, oyendolo kon muncha atansyon.
Kaji dos oras estuvimos en el doredor de la meza; komyendo, avlando, i riyendo.
La atmosfera estava tanto ermoza ke no supimos komo pasaron las oras. Para bever el kafe mos fuimos al salon i aya kontuneimos a kontar anekdotas.
Pasimos una nochada muy reushida i alegre.
Al otro dia, demanyana temprano, me fui kon mi marido a la eskola para asistir a las konferensyas.
En primero kije asistir a un famozo artisto de teatro, ma komo aviya muncha djente, i las personas en pyes desidi de asistir a una avla “La Vida es un Bal Maske” (Hayat Maskeli Bir Balodur). “Jaki Baruh”; mos demando los nombres i mos dyo una kupa de vino korolado kon una maska.
Ampeso a kontarmos la konseja de “PURİM” kon todos los personajes. El kombate (çatışma) del bueno kon el negro en muestra vida. Komo bivimos kada dia kon muestras maskas. Mizmo si estamos tristes, komo trokamos en una reunyon por egzempyo, i mos mostramos alegres.
El disho ke aryento de todos mozotros; ay el bueno i el negro komo “Haman”.
La istorya de Purim; la troko a la vida de la persona.
Kon su talento, i la kapachitad de avlar; konkuisto (fethetmek) muestros korasones.
Otra konferensya enteresante para mi fue;
“El kombate entre las djenerasyones diferentes”. (Kuşak Çatışmaları).
“Nesim Levi”; mos avlo de las partikolaridades de las djenerasyones, del nasimyento fina la muerte.
En pasando de una djenerasyon a la otra; mos mostro kon egzempios komo las tradisyones se estan peryendo, komo estan gastando los mansevos, komo se estan vistyendo, komo estan utilizando la teknolojiya, i komo no tyenen pasensya de suportar a los grandes.
Veramente estava muy enteresante, porke kada uno dentre mozotros esta bivyendo en sus famiyas todo lo ke mos konto.
El dentisto “Seyfi İşman” mos prezento;
“Las Fuersas Activas en el Sinema Amerikano”. (Amerikan Sinemasında Etkin Güçler”).
El es muy enteresado a todo modo de arte. Pentura, teatro, muzika, sinema i munchos otros.
Da una emportansa grande a la perfeksyon (mükemmellik) i todo lo ke aze es perfekto.
En su avla mos dyo a entender; todos los evenementos i los artistos ke fueron influentes en el sinema Amerikano, i a la fin unos sinkuenta aktores i aktrisas djudyos ke fueron reputados.
A la fin fue la prezantasyon en ladino sovre kuatro mujeres djudias emportantes. La semana pasada mi amiga Dora Niyego ya eskrivyo en este sujeto kon detalyos. A la fin de muestra avla; el Avocato famozo “Selim İşman”, ombre muy sempatiko i sangrudo metyo en shena un filmo kon un sujeto enteresante.
Komo de byervos apropriados ke topo para kada uno i uno, i en su rolo del komiser “Colombo”, solo al verlo kon el pardesu, todos se pisharon de la riza.
Kale tener un talento eksepsyonal para pueder topar tantas idiomas i byervos para azer konoser (tanıtmak) al den frente. Todos muy kontentes, mos felisitaron de korason.
Kero felisitar a todos i a todas las volontaryas ke tomaron parte en este dia emportante, yena de kultura, seyga en el punto de vista de orden, seyga en lo ke sirvyeron para komer, la abondansa de dulsuryas, de frutas, de bevyentas, seyga en la kalitad de los ke envitaron de paises diferentes i de muestro pais, para darmos una idea en diferentes sujetos.
Munchas Felisitasyones, i koraje bueno para el Ochen Festival de Limmud, ke esto asperando kon grande despasensya al anyo venidero.
