La palavra aze La palavra dezaze
(vyeja dicha de muestros avuelos)
Komo lo savemos todos, kada palavra es un sonido sinyifikante ke ekspresa una idea o da avizo de kualkyer koza ke se pasa serka o leshos del punto ande mos topamos.
Ma eya tyene tambyen un pezgo afektivo ke puede variar segun la persona ke la utiliza, ansi ke segun la sirkunstansya i el konteksto ande eya es pronunsyada.
Mos akontese de utilizar la mizma palavra de una manera diferente segun lo ke keremos ekspresar, “ravya”, “burla”, “afeksyon” ets... tomaremos komo egzempyo el adjektivo muy utilizado “bovo” ke es muchas vezes una indjurya o el produkto de una konstatasyon negativa, ma ke tambyen, en varyos kavzos, es empleada para manifestar muestra afeksyon enverso una persona. Entonses intervyene el tono adekuado ke solo parvyene a definir la karga de amistad ke es la muestra al momento ande la pronunsyamos.
Una kestyon mos vyene al tino: Eske ke konosemos egzaktamente el senso verdadero de kada palavra ke utilizamos? Es ke la utilizamos en la totalidad de su sinyifikasyon?
Hannah Arrendt mos dize ke “la avla de una persona es lo ke la situa lo mas en un espasyo de libertad i de afirmasyon de su personalidad”
En todo kavzo, un fakto ke no se puede nyegar es ke kada byervo yeva en si, un senso mas o menos diferente segun el objektivo por elkual el es utilizado,
La palavra es envezes “akto” a traves el kual, la kriansa humana (ke tyene la fakultad de pensar) se manifesta en su realidad ...ma eya no puede ayegar a una kompleta plenitud si el ke la dize no renunsya a la falsa iluzyon de ser oto-sufizyente.
Para devenir realmente akto, una palavra deve ser oida i si posivle entendida asta krear una reaksyon afirmativa o negativa en el interlokutor. Avlar no es solo pronunsyar tal o tal byervo, ma saver krear un dialogo, del kual solo puede realmente salir un verdadero rayo de luz .
La verdad no es una entidad monolitika, eya no tyene una sola facha; es por esto ke eya no puede ser aksesivle a los ke refuzan de oir lo ke dize el otro ....”Oir lo ke dize el otro” mos pusha a un muevo kestyonamyento de mozotros para mozotros, krea mezmo envezes una mueva vizyon de las kozas i por seguro es un enrikesimyento kontinual de muestra propya refleksyon .
Ke la nombremos: “byervo” , “vokablo”, “adjektivo” o “substantivo”, el sonido de una palavra en el espasyo ande mos topamos o la “ simple vista de su ser” sovre una pajina de papel, es komo una prezensya alegre o doloroza ke mos arranka de la soledad.
