Antes un mez, mi kolavoradora “KAREN”, ke fue dezinyada por el governo Fransez:
“Chevalier dans l’ordre des arts et des lettres” (Chevalier en el espasyo del Arte i de la Literatura); me bushko en envitandome a la resepsyon ke tuvo lugar en el Palasyo de Fransya shabat ultimo.
“Karen” mujer kultivada, muy aktiva i dirijente del sentro sefaradi de la lingua i kultura djudeo-espanyol en Estambol, tuvo el grande koraje de akseptar esta misyon emportante i kon su merito de lavorar muncho, i sus kreasyones, kontribuo a esta kultura muy presyoza.
“Karen” kon sus ideas briyantes realizo munchos proyektos kon su ekipa para ke el djudeo-espanyol no se perya i ke kontinue despues de muestra jenerasyon.
Komo tyene un potensyal alto, eya kreo la revista mensuel “El Amaneser”; ande todos los djudyos del mundo entero, pueden embiyar eskritas para dar sus ideas en todo modo punto de vista.
Kon el grande apoyo de “Silvyo Ovadya”, eya esta penando a konstituar los arshivos de muestra komunitad.
Karen i sus kompanyeros del grupo de “Los Pasharos Sefaradis”, mos azen sintir las vyejas kantikas de muestras madres en los konsertos ke dyeron en el mundo entero.
Shabat la noche mos fuimos al Palasyo de Fransya, ande aviya muncha djente; el Grande Rabino Rav. İzak Haleva, Bensiyon Pinto i su mujer, Silvyo Ovadya kon su mujer, los amigos, amigas, i profesores de Karen de la Universitad de Boğaziçi, los myembros del grupo “Los Pasharos Sefaradis”, los kollavoradores de sus proyektos. Toda la famiya del jurnal “ŞALOM”, i su kerido marido, esfuegro, su ija luzya i munchos otros partisipantes.
El Konsolo de Fransiya “Hervé MAGRO” izo una avla kon munchas alavasyones a Karen ke lo merese, sovre todo lo ke puido realizar en este sujeto.
A la fin de su avla le prezento la medalya i todos la aplodisaron.
Despues Karen ampeso a avlar en remersyando al konsolo al nombre del governo Fransez i a todos los partisipantes.
Eya se akodro de su padre (ke este en ganeden) ke su lingua maternal era el fransez i lo avlava de una manera perfekta. Del diya ke nasyo la madre i el padre le avlaron en fransez, i Karen sin estudyar del todo esta lingua se lo ambezo. A parte en sus kazas se avlava el djudeo-espanyol. Eya disho ke; estas todas linguas la enrikesyeron sovre las ideas, i la fasilitad de konversar kon munchos amigos de diferentes paises. Mos konto la fondasyon de su grupo de muzika Los Pasharos, despues la istorya d’El Amaneser, ke es publikado enteramente en esta lingua.
Remersyo a la Fransya, para la emportansa ke esta dando para konservar esta lingua i el apoyo ke esta dando para pueder arekojer los dokumentos.
A la fin Karen disho ke se engrandesyo kon munchas kantikas en diferentes linguas. Kon su boz maraviyoza de seda, empeso a kantar las kantikas en fransez i en djudeo-espanyol de muestra chikes.
Termino en remersyando a todos los ke le estan dando apoyo para pueder luchar kon las difikultades para konservar esta lingua i a su marido kon su ija.
A la fin uvo un kokteyl riko i la nochada se eskapo kon muncho entuzyasmo.
Una mujer ke da konfiensa al ke esta allado, una madre kerensyoza, modesta, laboryoza, kon su saverisyo i kon su personalitad adjusto al den frente munchas valores para puder reushir en su misyon sakra.
Kerida Karen; te oguro una vida kon tu marido i ija yena de sanedad, prosperitad, felisitad i muncha reushitad.
“Tu sos el orgolyo de muestra komunitad”.
