“Eske Israel, uno de los payizes los mas adelantados del Oriente Medyo i Serkano, el Israel de las grandes Universidades i de los Sentros de bushkidad syentifika, de la rasyonalidad i del ideal de universalizmo, komo tambyen de la demokrasia i de la igualidad delantre la djustisya, se esta dirijyendo verso lo ke es su kontraste: “un integrizmo echo de obskurantizmo” al seno mizmo de la relijyon delakuala los reales preseptos de baza son la Djustisya i el Respekto enverso el otro?
Ay de esto pokos dias, meldi en la prensa Franseza (si no me yerro en el kotidyano elektroniko Le Point) un artikolo sinyado por ‘Thierry Ogier’ i su korrespondente en Yerushalayim ‘Daniel Krigel’, ke dize tekstualmente lo sigyente:
“Los yaman los ‘mansevos de las kolinas’, en hebreo ‘Noar Ha Gvaot’. Eyos son adolesentes djudyos entre 15 i 17 anyos, envezes mizmo entre 20 i 30 anyos, ke estudyan en las eskolas talmudikas las mas radikales del movimyento de kolonizasyon. Algunos de entre eyos moran sovre lo ke las otoridades Israelyanas yaman ‘primeros puestos’, estos puntos de kolonizasyon fraguados en Sisjordania sin otorizasyon del Governo Israelyano. Eyos se rekojen aya, bivyendo en kavernas medyas destruidas”...
Estos mansevikos i mansevikas se referan todos a la ensenyansa de los Rabbinos ultranasyonalistos segun los kualos ‘la instalasyon sovre la totalidad de estas tyerras es un evento mesyaniko.’
Por kontra,en konformidad a la ley internasyonal, los Juristos Israelyanos, eyos, interdizen semejantes aktos.”
A kualo kere ayegar este integrizmo absoluto ke tyene el objetivo klaramente irrealizavle de sigir ‘no en sus verdadera sinyifikasyon espiritual, ma simplemente en sus forma eksteryor’ preseptos i rekomendasyones kontenidos en vyejos dokumentos ke datan munchas vezes de syenes i syenes de anyos?
Ke sera el rezultado de esta obstinasyon a refuzar sistematikamente kualkyer akseptasyon del konteksto historiko aktual, tanto ke el no prejudisya el esprito de muestra ley bazada sovre el humanizmo i el progreso? Muevas kontestasyones del kampo adverso, muevos motivos de pletos i de litijyos ke de dia en dia aumentaran el potensyal de odyo i de prekaridad entre los dos payizes i pusharan una manseves por seguro potensyalmente muy valoroza, a undirse en la horor de una gerra interminavle...
