Vaclav Havel, uno de los grandes ovreros de la demokratizasyon del Este de la Evropa, serro por syempre sus ojos Alhad pasado, a la edad de 75 anyos.
Simbolo de Djustisya i igualidad entre todos lo sitizanos i sovre todo de libertad de kada individuo en los limites judisyales de la ley, el sirvyo de egzempyo a munchos shefes de payizes ke se topavan debasho la influensa Sovietika.
Segun lo ke dize la Prensa Oksidental, son multiples los grandes ombres de Estado ke le rendyeron un homenaje kayente i sinsero.
Entre munchos otros: el Prezidente de los Estados Unidos Barack Obama disho ke Vaclav Havel avia inkarnado las aspirasyones de la mitad de un kontinente kortado en dos ...su rezistensya pasifika estremesyo los fundamyentos de un imperyo i mostro la vazior de una ideolojia represiva.
El sekretaryo jeneral del Konsilyo Evropeo deklaro, el, ke la Evropa esta yorrando uno de sus djigantes ansi ke un eroe de la libertad.
De su parte, la kanselyer Almana Angela Merkel saludo un grande Evropeano i disho: ke su kombate por la libertad i la demokrasia es inolvidavle. Eya pronunsyo tambyen las palavras sigyentes: ‘Mozotros los Almanes mos sentimos partikolarmente en devda enverso el’.
Ke su alma repoze en paz i ke su nombre sea syempre el simbolo de un egzempyo a segir para todos los dirijentes de kualkyer payis.
