En unos kuantos dias la fin del anyo 2011, un anyo de mizerya, ambrera i dekadensya, un anyo de obskuridad i de obskurantizmo…gerras inspiradas por simples interesos materyales o byen por un dezeo insurmontavle de supremasia… guerras igualmente fratrisidas ande ermanos i amigos kombaten kon grande frekuensa los unos kontra los otros… destruisyon i profanasyon de lugares santos … puevlos en estado permanente de ravya… una kriza ekonomika insurmontavle de dia en dia mas kruela en sus konsekuensas, abizmos profundos ke separan, en este empesijo del treser milenaryo, las diferentes klasas sosyo-ekonomikas, governos munchas vezes konsyentes de sus inkompetensya a dominar la situasyon ma ke refuzan de abdikar.
Oy ay la guerra ande devia aver la paz…el dolyo ke remplaso las esperansas de alegria i de djustisya, luchas diktadas por profitos personales i orgolyo.
Ke sera el anyo vinyente? En desparte de los kataklizmos naturales kontra los kualos mozotros simples mortales no puedemos nada, lo ke sera en este muevo anyo depende tambyen del ombre el mizmo, de los grandes de los payizes komo igualamente (por seguro a un grado muncho mas inferyor) de kada uno de entre mozotros, de la suma de esforsos personales de kada kazalino o sivdadino….
Lo ke dezeo por este muevo anyo? Buena voluntad, fraternidad I humanizmo…
