Este no es un teksto de 14 Febrayo, fyesta de los enamorados ke emplei solamente komo introduksyon. Kada uno la selebra asigun el dezeo de su korason. Oy pensi de analizar un poko los sentimyentos en muestro Siglo i eskrivir otruna vez sovre este sujeto. El benadam no es solo un fenomeno de karne i de guesos. Tyene tambyen meoyo, i korason. Kijo dezir, tyene fakultad de pensar, de djuzgar, desidar. İ, tyene sentimientos. Ma, estamos vyendo ke en el 21. Siglo, los sentimientos estan mas o menos eskondidos, kamuflados por no dizir abandonados.
Alegrarse, atristarse, reir, yorar, kerer, amar, eskarinyar ets.. estan en sigundo plano, guadrados debasho un septisismo o una falsa indiferensya. Afilu, la manera de pensar, la filozofiya estan trokando de djenero. Naturalmente, son sensasyones abstraktas, par konsekuensa, un poko difisil de eksplikar, de transformarlas en byervos. En desparte, yo esto avlando asigun mis observasyones, mi opinion i no de una jeneralidad.
Naturalmente rekonosemos el poder de la teknolojiya del 21. Siglo. Ma, ay una kestyon o dos ke se pozan: “Porke se deve sakrifikar los sentimientos para pueder alkansarla o no se puede bivir los dos endjuntos?” Efektivamente, se esta vyendo las maneras diferentes de pensar, afilu en los livros, (o en syertos) ke estamos meldando, los filmos (la mayoriya) ke se estan projektando. En la T.V en las novelas estamos remarkando una furor, un dezeo de destruksyon, un aleshamyento de sentimientos buenos.
Sin kerer egzajerar, puedo afirmar ke las relasyones sentimental, eyas mizmo, trokaron. El materyalismo esta tomando munchas vezes el lugar del romantismo. En el mundo del 21. Siglo, ande se pyedro la uzansa de eskrivir letras, la posta elektronika, mesajes por G.S.M, estan triunfando. Las letras en jeneral, ma, espesyalmente, las de amor, no eran solamente un medyo de komunikasyon, ma tambien, eshantiyones de literatura. Komo los filmos nostaljikos preto i blanko, tambien las letras manuskritas eran mesajes de amor, de amistad, en kurto, de sentimientos. Egzaktamente komo disho Jean Jacques Rousseau: ”La korrespondyensa de los amigos, redobla sus egzistensyas.”
Si me akodro bueno, en un vyejo artikolo miyo, tengo eskrito ke el amor se transformo en un materyal de komercho. Kazamyentos kon kontratos! Los amores lejendaryos ke uzavamos a ver en los filmos, al pareser kedaron en el pasado. Por siguro ke egziste oy tambien munchas personas ke toman plazer del romantismo, esto no se puede enyegar. Esperaremos ke el estado aktual, es komo una ola de moda, un ”trend,” ke va trokar kon tyempo. Estas personas se van a render kuento, ke el materyalismo no es syempre sinonimo de felisidad.
Un profesyonal, a la pregunta: “Es ke en el 21. Siglo el amor i los sentimientos en jeneral, estan konservando sus aktualidad, sus ermozura?”, respondyo ansi: “Puedo dezir en partida, si, en una manera limitada. En las komunidades avansadas en teknolojiya, la nosyon de famiya, esta pyedrendo su importansa de diya, en diya. Sentimentalmente, las personas se estan arrondjando a la soledad. En estas komunidades, el materyalismo esta mas dominante. Ma, no devemos olvidar ke la persona nesesita kerensya, amistad, mizmo si no bive o no konose el amor. Alo menos mos kereremos i mos respektaremos de parte a parte”.
Estas palavras eksprimiendo la opinyon de un espesyalisto, no estan muncho enkorajando. Se estan, afilu, aserkando un poko del pesimismo. Ma, yo kero pensar, syendo ke los sentimientos syempre fueron umanos, una parte inseparavle del benadam, no deven, no pueden despareser. Kero kreer ke estan eskondidos o enyegados en partida, por la ora…
Ya es verdad, ke en una mezura, estamos bivyendo una epoka de teknolojiya, ke el materyalismo tomo el lugar del romantismo. En vezes penso ansi, ma no syempre! Esto sigura ke oy en diya, el romantismo tyene su lugar eskojido. Esto lo vemos en las selebrasyones del 14 Febrayo. No es ansi? Selebrasyones ke mos dan esperansa. Keridos amigos entrad kon amistad i kerensya al anyo muevo.
