Komo lo dishe mas o meno la semana pasada “Anyada mueva, muevos espantos i tambyen muevas esperansas, muevos problemas i muevas solusyones, muevas kestyones i deke no mueva bushkida de repuestas. Lo importante es de no kedar impasivle “.
Alhad pasado, primer dia del anyo 2012 , el tyempo estava luvyozo, el syelo grizo kuvyerto de nuves kaji pretas. Es muy probavle ke syertos pesimistos pensarian a un negro prezaje.
Si mi defunda madre bivia eya dizeria simplemente “el syelo esta kuvyerto? tanto byen, es siman de azlaha”.
Ay maneras i maneras de ver i djuzgar las kozas... muncho depende de muestra mirada, i de lo ke bushkamos, kuala sea la situasyon en la kuala mos topamos.
Mi madre no era una persona partikularmente favorizada por el destino, a 27 anyos kedo bivda kon la responsabilidad de dos ijas la uno aedada de 5 anyos i la otra de 10 mezes. İ mas tadre a la edad de 55 anyos eya konosyo la terrivle amargura de pedrer la una de entre eyas arrankada salvajamente a su amor de madre por un maldicho i inegzoravle mal.
İ malgrado su enorme dolor, eya nunka se kesho, nuınka maldiziya... Eya yorava solamente en mi prezensya, nunka delantre la djente....
No es ke era naturalmente optimista ma se esforsava de serlo... Su kreensa en una huersa espiritual Superyor (ke eya no puedia eksplikar) era grande, syempre omniprezente, i esto la ayudo muncho.
Es ke eya konosyo el dubyo? Por seguro si... no se puede tener la verdadera fey sin aver konosido el dubyo...
Es syempre ansi de mozotros djudyos, komo lo disho el grande pensador fransez Blaise Pascal: “El ombre se topa syempre en un espasyo dezyerto entre la Eternidad i el nada” , i es a mozotros ke kaye la responsabilidad de eskojer muestro kamino.
“Este ovligo kontinual de tener syempre a desidir por ande mos devemos ir” es (a mi pareser) la kondisyon de la perenidad del Djudaizmo; responsavilidad asumida por kada djudyo, ke sea kreente o agnostiko, responsavilidad ke lo pusha a nunka kedar estatiko ni pasivo
