Es una inmensa alegria de empesar el anyo 2012 kon una semejante buena novela. Aunke ay un largo tyempo ke todos ya konosemos i apresyamos la grande valor artistika de las ovras de İzzet Keribar al kual fue atribuido asta oy varyos otras distinksyones muy presyozas, la obtensyon de este muevo Premyo de una envergura partikular realsa ainda mas el prestijyo de su lavoro.
İnisyado a la fotografia desde su adolesensya por su ermano Leon Keribar, İzzet mostro un grande interes por este arte i se perfeksyono ainda mas durante su Servisyo Militar en Korea entre 1956 i 1957.
Mas tadre, kazado i padre de dos kreaturas una ija i un ijo, sus responsabilidades familyales lo ovligaron a konsakrar a su komersyo de tekstil una grande parte de su tyempo, todo en kontinuando de kultivar su arte en diletante.
Su retorno estable a la fotografia se produzyo en 1980... Entonses el empeso a viyajar kon grande frekuensa, por empesar en Turkia mizmo, espesyalmente en la Anatolia i tambyen en differentes otros lugares del mundo, i paralelmente devino myembro del mas ansyano kub de fotografia de Istanbul (IFSAK).
Oy en dia, su aktividad de fotografo de arte es rekonosida en el mundo entero, el fue honorado de multiples aspresyasyones komo, en el anyo 1991, a la segida de un lavoro egzekutido kon la kolavorasyon del konsolato Jeneral de Fransya en Turkiae, el fue dekorado del Orden de “chevalier des Palmes académiques”.
En desparte de esto, la Federasyon Internasyonal de Arte Fotografiko le atribuo dos premyos entre los kualos en 1988 un Premyo de Ekselensya.
İzzet Keribar resivyo igualmente nombrozas otras grandes distinksyones internasyonales entre las kualas el segundo premyo de la “National Geographie” , el Primer premyo de “Jerusalem Post”, el grande Premyo “Ballantine”, el Primer Premyo de “Fuji-Euro-photographies” i en 2001 el “Premyo Millenium”.
Sus fotografias son publikadas en multiples magazines, entre otras: Atlas, Skylife, National Geographic Traveler, GEO ets...
Segun lo ke meldi, aktualmente Izzet Keribar ensenya el Arte de la Fotografia en el klub IFSAK i aze parte de munchos juris de konkorsos internasyonales. El tambyen kolavora kon el Ministeryo de la Kultura i del Turizmo Turko para la promosyon de su payis.
Dos uvrajes kompuestos de sus fotografias fueron publikados: “Terra Magica” en 1999. İ “Viaje en el Tyempo “ en 2004.
Kon su noblesa natural ke se refleta en sus ovras, İzzet Keribar realsa intelektualmente i artistikamente su payis, su famiya i tambyen la komunidad a lakuala el apartyene.
