En “El Amaneser” de Desembre izimos un moabet de fin de anyo. Avlimos de buena umor, de optimismo i muy poko de felisidad. En estos diyas ke estamos bivyendo el presipyo del anyo muevo, tenemos muevas esperansas, muevos proyektos o puede ser kompletar los ke no pudimos realizar en el anyo 2011. Tambien, ay probabilidad ke syertos de muestros dezeos mas o menos de karakter personal, komo trokar kaza, proyekto de un viyaje, o la esperansa ke los ijos van a entrar a la Universidad ets…no se kumplieron.
Keridos amigos, estos suetos no me apartienen. Los siti solamente komo egzempyos. No tengo dinguna entisyon de trokar kaza ni proyekto de viyajar. Tambien, i los inyetos grasyas a los sielos ya eskaparon la Universidad. Bueno, al lado de estos ke kalifikimos komo personal (o privados) ay los suetos unanim, los dezeos komun de todos mozotros.
Kuando me dechidi de azer un chiko teksto komo mesaje de muevo anyo, pensi kualo puedo dizir mas ke repetar lo ke eskrivimos syempre. En una manera, nada de muevo. Devemos konvenir, en jeneral lo ke eskrivimos o dizimos a esta okazyon, mas o menos son frazas asemejandosen. Tenemos komo un “prototipo”. Eskuzad keridos amigos por aver uzado este byervo. Ma es la realidad. Por siguro ke kada uno de mozotros lo trokamos a muestra manera. Ma tenemos en el fondo los mizmos dezeos i no ay dingun dubyo ke los suetamos kon sinseridad, del fondo de muestro korason.
Espesyalmente los anyos de alkavo estamos dezeando paz i repozo en el mundo al lado de muestros suetos de salud, parnasa buena i felisidad. Yo esto konvensida ke si ay repozo en el mundo, si tenemos una salud diremos buena i una syerta prosperidad, vos demando keridos amigos kualo mos manka para ser orozos? No es esto felisidad? Deve de ser ke si. Ma por la ora esta solo komo un suenyo, un dezeo o un sueto la Paz en el mundo.
Bueno, komo definir la felisidad? İmposivle!. Reelmente no se puede dar una definisyon de esta nosyon ke troka de persona a persona. Esto ya lo ekspliki mas o menos en mi teksto del mez pasado. Portanto, yo si no puedo dar una definisyon, penso dar al lektor, una simple “Resefta de Felisidad” komo regalo de anyo muevo. Ansi, puedesh ser orozoz si TENESH:
- En la vida un buto ke vos da satisfaksyon.
- Un echo ke vos mantenga.
- Rikeza bastante para menesteres bazikos.
- Buen meoyo pudyendo balansar lavoro i distraksyon.
- Una kerensya para tomar plazer de vuestro derredor.
- Un sentimiento de buendad i ayudar el menestrozo.
- Koraje para afrontar los problemas i solverlos.
- Bastante buena umor para riir o sonreir a la okazyon.
- Esperansa de pueder tener un buen futuro.
- Salud permetyendo de bivir la vida kon todas sus valores.
- İ enfin, un fuerte sentimiento de agradesimiento de “lores” al D. por lo ke posedas.
Keridos amigos, komo estash vyendo, kon un poko de buena veluntad se puede alkansar a ser orozos. A mi si me demandash, yo digo si tenemos razones de azer lores, es ke ya devemos konoser una syerta felisidad. Desde unos, kuantos anyos me rendi kuento ke es muy importante de tener antes de todo, una salud buena para pueder bivir la vida kon todas sus valores, amistad i kerensyas. Naturalmente no es solamente mi opinion.
Espero i sueto sinseramente ke todos vuestros dezeos se realizen en un mundo mas mijor en el anyo 2012.
