Alhad la tadre, en Fransya, en el programa televizado del sito ‘Fr.1’, Dominique Strauss Kahn izo la konfesyon de su relasyon seksual konsentida de las dos partes kon la kamarera del Hotel Sofitel ‘Nafissatou Diallo’, sin absolutamente ningun akto de agresyon enverso eya. Digan lo ke digan varyos kritikos syempre prontos a kontestar, su ‘Mea kulpa’ publika fue un akto de koraje moral i de oto-djuzgamyento de la parte del presedente direktor del FMI, un djenero de ‘kestyonamyento interyor’ ke lo pusho a dezir ‘fue mas ke una debilidad, fue una kulpa’. El se ekskuzo sinseramente enverso su mujer ke lo sostuvo de una manera admiravle, enverso su famiya, enverso sus amigos i tambyen enverso el puevlo Fransez en su totalidad. La arrestasyon del 14 Mayo fue trajika i los dias de enkarselamyento en una horrivle prizyon fueron tromatizantes para el , asta kel Prokurador Jeneral del tribunal de Newyork se renda enfin kuento ke las deklarasyones de la supuesta viktima eran yenas de kontradiksyones i de elementos falsos. Ninguno save egzaktamente lo ke se paso en la kamareta del hotel Sofitel, muchos detalyos kedaron obskuros. Ke bushkava Nafissatou en esta kamareta okupada ainda por un kliente? ningun sinyo sinyifikativo de abuzo seksual fue topado sovre el puerpo de la kamarera, ni tambyen (i esto es muy muy importante) sovre el puerpo del pretendido kulpalve. Si se tratava de una agresyon, eya tenia todas las posibilidades de defenderse; alta, byen proposyonada, en la fuersa de sus 33 anyos de edad, auzada en su funksyon de kamarera a esforsos fizikos kontinuales, eya no se topava en la imposivilidad de luchar, lo ke desha trasas sovre el puerpo del adversaryo. Se puede lojikamente pensar ke uvo una trampa (tuzak),komo mo lo aze supozar la konversasyon telefonika ke eya tuvo, poko despues el akontesimyento, kon su amigo inkarselado por kestyon de droga, konversasyon en la kuala eya avia dicho aproksimativamente ‘Ay muncha moneda a travar….’ i ke avia sido enrejistrada probablemente sin ke eya se renda kuento, puedeser otomatikamente de la parte de los servisyos de la prizyon ande su interlokutor se topava. Es verdad kel raporto definitivo del Prokurador Jeneral de New-York no mensyona klaramente ninguna palavra de absolusyon, ma el simple fakto de afirmar ke no ay ningun elemento valido de inkulpasyon es a el solo una diskulpa. La djornalista Claire Chazal demando a Strauss Kahn si pensava ke se puedia tratar de un komploto … ‘No se’ respondyo el eks kandidato a la prezidensya de la Republika Franseza, por las oras no puedo formular ninguna supozisyon.…. La prensa franseza esta de dos avizos. A mi pareser, avia una syerta noblesa en la manera de avlar de Strauss Kahn, i muncha, muncha tristeza.
