Es seguro, ke nada es seguro.
Blaise Pascal
Lunes pasado, la chanta en la espalda, livros muevos en la mano, los ninyos i ninyas tomaron el kamino de la eskola.
En sus korason la amargura de la fin de tres mezes de vakansas i tambyen el albon de un muevo anyo de estudyo a enfrentar, sujetos deskonosidos sovre los kualos eyos devran lavorar i refleshir, problemas ke a primera vista paresen insolubles a rezolver, largas pajinas de livros a memorizar…i en desparte de esto, el enserramyento durante largas oras en una klasa ande todo no es syempre ‘amistad, paz i harmonia’, kuando ahuera el sol aze briyar las ojas ke ainda kedaron vedres i los pasharos bolan de un arvole al otro.
En los korasones de las madres la esperansa sin o kon razon ke este anyo sera diferente de los otros, manko difisil i puede ser mas fruktuozo.
Eyas saven ke en estos onze, dodje o puede ser kinze o disyete anyos de estudyo, los ninyos poko a poko fraguaran sus vida a venir.
Ma ke sera el mundo en dodje o kinze anyos? ke sera el futuro de estos ninyos? muevas amistades, muevos dezeos, muevas aspirasyones i de mezmo muevas responsabilidades a asumir.
Munchas vezes mos demandamos: ‘’Es kel benadam de los siglos pasados no era mas mazalozo kel de los tyempos prezentes’’ …mankas ambisyones, mankos ovligos, kada uno indo a su propyo ritmo, libre de eskojer su kamino, libre de koryer en los kampos, kuryozo de la natura ke lo entornava.
Ma vijilante en permanensya, la realidad kon sus nesesidades imperativas, mos ovliga a retornar a los tyempos prezentes i de muevo es la mizma kestyon ‘ke va ser el futuro de mi ijo o ija?’
Difisil de responder a esta kestyon, lakuala portanto parese muy simple. Por seguro semos diferentes los unos de los otros; kada individuo es a el solo un mundo en si; kon su sensibilidad konjenital mesklada a eksperyensas afektivas diferentes, el tyene su propya vizyon de la realidad ansi ke un sistema de pensar ke es deskonosido a otros…
İ mizmo (lo ke es lo mas estranyo) ninguno es monolitiko en su personalidad; a kada minuto, diferentes faktores eksteryores entran en aksyon, provokando en la kriansa humana ‘reaksyones diferentes’… Ninguno de entre mozotros es syempre absolutamente igual a si mizmo.
A la diferensya del mundo animal, el individuo humano no yeva en el un programa instinktivo aparejado de antes. En el, segun el momento i las sirkunstasyas, intervyenen trokamyentos individuales ke repozan sovre afrontamyentos kontinuales entre elementos diferentes.
Ke va ser el futuro de todos estos ninyos ke tomaron el kamino de la eskola? Ken lo puede dezir?
