Keridos Korelijionarios
Esto bien kontente de pueder aderesarvos mi boz una otra ves en okazyon de la entrada del nuevo anyo.
Suheto ke mi mesaje vos enkontre sanos i saludosos todo en augurandovos ke el nuevo anyo ke estamos entrando vos pase en kondisyones mijores de el anyo ke estamos terminando.
“Tihle Shana Vekilelotea Tahel Shana Uvirhotea”
Komo ya lo savemos muy bien Rosh Ashana no solo ke es la fin de un anyo i el empesijo de otro un anyo nuevo en le kalandaria, sino ke mas antes i mas emportante de todo esto es una de las oportunidades para dar un nuevo empesijo a nuestra vida konforme a los preseptos de nuestra santa Tora ke esto es la “Teshuva”.
Muy klaro ke el alkansar a la konsensia de “Teshuva” no se puede limitar dentro un sierto tiempo pero no se puede enyegar ke las “Fiestas de Tishri” ke empesan kon “Rosh Ashana” i siguen kon “Yom Kipur, “Sukot”, “Oshana Raba”, “Shemini Atseret” i se finalizan kon “Simhat Tora” posedan una enerjia espsial ke enfulensan nuestro esprito de egzaminar nuestra konsensia i reformar nuestro modo de bivir.
No ay dubyo ke nuestros keridos korelijionarios profitaran de la okazyon.
Este periodo de tiempo tiene una otra emportansa ke komo es un periodo yeno de orasyones provaka el ajuntamiento de nuestros korelijionarios dentro las sinagogas i desarola nuestra veluntad de ayudo i solidaridad.
Komo una kolektividad ke esta amenguandose en populasion, no ay dubyo ke el menajar kon perfeksion nuestras enstitusiones i fondasiones nesesita la kontibusion moral i material de nuestros korelijionarios.
A mi idea el tiempo el mas adekuado de esta kontribusion es ahora.
En este punto tengo de repetar una otra vez aki unos versetos del “Pirke Avot” ke es uno de los pilares de nuestra kultura relijioza.
“Si yo de mi no me aprovecho de ken me puedo aprovechar?
Si yo penso solo en mi kualo es ke so yo?
Si no es ahora kuando?”
Keridos Korelijionarios
Seya komo komunidad o seya komo individuo es muy probable ke de vez en kuando puede akonteser periodos de anksiedad i preokupasion, o bien puede akonteser flakezas. Lo emportante es de no deskorajarse i desesperarse mezmo en estos tiempos i guadrar nuestra konfiensa verso el futuro.
“Rosh Ashana” es un periodo ke nos promete esparansas i konfiensas nuevas, ademas mo lo asigura kon la garansia de El Todo Poderozo.
Komo ya lo savesh nuestra Santa Tora nos deklara:
“No nos desha i no nos abandona en todo lugar ke estamos i en toda situasion ke nos topamos i no denunsia ke es nuestro Dyo”
Rosh Ashana es el tiempo adekuado de refreskar nuesta konfiensa.
Siendo yeno de estos sintimientos i pensamientos vos suheto una aynada buena kon vuestras famias i keridos i rogo ke esta aynada seya una aynada de paz, union, sanedad, prosperidad i felisidad para todos nuestros korelijionarios i para toda la humanidad todo en bendizyendovos kon las bendisiones da la Santa Tora.
Tizku Leşanim Rabot
Leşana Tova Tikatevu
Rav İsak HALEVA / Gran Rabino
