Dyo Piadozo, Tu ke dates a la persona ‘el libre arbitro’ i ansi la total responsabilidad de sus aktos !
Damos la fuersa de ir mas leshos ke muestros sentimyentos de odyo i muestros dezeos de vengansa,
Damos el koraje de salir de muestro solo “Yo” i de kerer ver klaramente lo ke se pasa en muestro entorno.
Ke muestros ojos miren mas leshos ke lo ke es vizivle i muestro senso de la djustisya mos ayude a giarmos verso la toleransa, i mizmo (kuando es posivle) verso la komprensyon de otro!
Ke la grandor de muestro poder de perdonansya sea mas fuerte ke muestra vanedad!
Kel esprito de ekuidad prevalga sovre el interes del momento, i kel amor de la Paz triumfe kontra la rankor i la sanya!
Damos la fuersa de defender muestros derechos ma tambyen de akseptar los de los otros!
Ke tengamos la voluntad de eskojer la verdad en su otentisidad i no la glorya en su fasto, ke muestros aktos sean imprenyados de esforsos por la igualidad i no por la superyoridad!
Lo ke yo demando a los Syelos i auguro a mis keridos ansi ke al mundo entero es:
Harmonia, paz i kontentes en los korasones.
Ke ninguna madre ni ningun padre (amigo o enemigo) sea amargado en su korason!
Ke predominen “el amor i la kerensya” kontra el “menospresyo i la indjustisya”.
Kel dialogo aleshe la rankor, i kel esprito de libertad pueda venser la tirania!
