En este empesijo del venteiunyen siglo ke malorozamente se anunsya komplekso i dramatiko, kaji todos los puevlos paresen tener dos fachas, la una tornada verso la luz, la otra oskura
Es kaji syempre ansi de la humanidad, meskla kompleksa de aspirasyones verso todo lo ke es luminozo i de impulsos irrezistivles ke la pushan verso abizmos de odyo i de refuzo del otro.
İsrael vyene de ser onorado por el premyo Nobel de Kimika desernado a Daniel Schechtman i el Djudaizmo fue realsado por todos los ke fueron atribuidos a savyos djudyos de payizes diferentes ke los partajaron kon otros syentifikos.
Desde su kreasyon en 1948, Israel okupo un lugar importante en el espasyo de la Syensya i del adelantamyento humano... Kon su Instituto Weissman i los multiples otros sentros de invistigasyones, sus prestijyozas universidades ande se enkontran kada dia mansevos i mansevas orijinaryos de varyos lugares, ken en “short” i “fusta kurta”, ken tambyen una kipa sovre la kavesa, i sovre todo kon sus hospitales de alto nivel ande amigos i enemigos resiven los mizmos kudyos, el es oy uno de los payizes los mas adelantados en varyos ramos de la saviduria.
Ambezado desde milenaryos a rezistir a la fuersa brutal del enemigo, el puevlo djudyo nunka aboko la kavesa i se afirmo por la amplor de su desvelopamyento kultural i la madureza de su pensamyento.
Oy en dia , munchas vezes mos demandamos “Ke es la koza ke, en el futuro, asegurara la perenidad de esta chika nasyon ? “La dimensyon de sus tyerras?” por seguro no, ni la “huersa de su armada”...ma por seguro la huersa de su potensyal de refleksyon.
No digo “de su intelijensya” ma “de su refleksyon”, un potensyal de refleksyon ke era eskrito en su destino de “puevlo errante” persigido kontinualmente por perikolos imprevizivles, lo ke syempre lo pusho a ser en estado de alarma kontra varyas amenazas, sin por esto kedar enserrado en si mizmo ...
El syempre se esforso de ser avyerto a los otros, ayudar i abediguar. Esta rikeza abstrakta, el la topo en “la Biblia” ke tyene komo kodigo espiritual i sosyal: el “Respekto de la vida de ken ke sea” i “rekomanda la solidaridad no solo enverso sus propyos korelijyonaryos ma tambyen enverso los otros”. El profeta İsaie mos ordona de “Romper las kadenas de la injustisya, de dezatar las ataduras del yugo, de liberar los ke estan oprimidos i meter fin a todo modo de servidumbre”.... En diferentes pasajes, el Livro Santo mo lo demanda imperativamente i esto kon grande frekuensa. Desde el empesijo, El mos impozo el konsepto de la absoluta igualidad entre los ombres, sin distinksyon de rasa, fey o orijen.
Ansi el Djudaizmo pudo dar al mundo mensajes etikos de una valor inegualavles: “Universalizmo”, “Ovligo de kudyo enverso el estranjero ”, “Prinsipyos de Djustisya”: “Mizma juridiksyon para el riko komo para el prove”, “para el ajeno komo para el sitizano” i syempre “Dever de ayudo no solo enverso la Bivda i el Guerfano ma tambyen el “Estranjero.”
İ la semana pasada, paradoksalmente, un punyado de mansevos fuertemente atados a la Torah ma pushados por un fanatizmo syego, profanaron tombas de simiteryos Musulmanos komo Kristyanos.
Komo eksplikar este kavzo? Es ke este akto de una ekstrema barbaria es el rezultado de una ensenyansa unikamente fokalizada sovre las solas valores de muestra Fey sin konsiderar la importansya de las otras?
Los grandes del payis “Shimon Perez” komo tambyen “Binyamin Netanyahu” blamaron kon amargura este kavzo ke malorozamente arrebasha la grandor de muestro puevlo en su esensya etika i humanista.
Problema ke demanda de ser solusyonado lo mas presto posivle.
