La semana pasada Robert Sezer serro por syempre sus ojos a una vida ke, desde su adolensensya, el avia konsakrado a la ermozura i a la harmonia.
No pude eskrivir immedyatamente despues su muerte, por falta de espasyo en la unika pajina del Şalom de la semana pasada konsakrada al Djudeo Espanyol, i es oy ke lo ago, paralelmente a mi kolega Şeli Gaon, la kuala kolavoro largos anyos kon el defundo i vos eskrive sovre el ombre de aksyon, aktivo en la esfera komunitarya i karitativa..
Yo vos kero avlar del poeta ke el fue en sus aspirasyones, el poeta ke publiko a la edad de 18 anyos un livro de poemas nombrado “Gönül Çağlayanı” i ke eskrivyo el teksto del himno del Liseo Djudyo. Tambyen kero avlar del poeta ke el kontinuo a ser asta la fin de sus dias en la vida kotidyana, ansi ke de su amor por la kultura, elemento mayor de su personalidad.
Esta pasyon por todo lo ke es “ermozura i harmonia” se reflektava syempre en su mirada, sus djestos, su manera de avlar i mizmo en las palavras eskojidas ke el utilizava en toda simplisidad.
En su diskorso, el dia de los funerales, su amigo intimo Davit Eskinaz avlo entre munchas otras kozas muy pozitivas, de su amor por la litteratura, de su partisipasyon, kuando era adolesente, a la gazeta anual de la eskola, nombrada MUM, i de su kollavorasyon mas tadre, kon otros amigos, a la kreasyon del primer djornal djudyo kompletamente eskrlto en lingua Turka, debasho la nombradia “Haftanin Sesi”.
Robert Seze muryo a la edad de 74 anyos, se puede dezir prematureamente, a una edad ande un intelektual portador komo el de un ideal de humanizmo tyene ainda muncho a dezir, muncho a ambezar, muncho a realizar.
Ke su alma repoze en paz.
