Rabbi Yeshua Ben Levi, teniya un dezeo ke lo tormentava diya i noche: ver el Profeta Eliau. Para alkansar a la grasya de Los Sielos, arrogo diya i noche, izo taanit... I enfin, su dezeo se realizo. El Profeta Eliau se mostro a el i le prunto: “Kualo demandas de mi?”... Rabbi Yeshua respondyo ke keriya akompanyarlo en sus viajes, ver lo ke aziya i tomar lisyones de sezudeza. El Profeta le respondyo ke era difisil de somportar el espektakolo de sus aktos i tambien de entender sus razones. Rabbi Yeshua aprometyo de no deranjarlo kon sus preguntas. “Esto achetando” deklaro Eliau. “A kondisyon ke no me vas a demandar absolutamente nada. Savelo bien, a tu primera kestyon, te esto abandonando”.
Salyeron al kamino, arrivaron a la kaza de un povereto, ke posedava solamente una vaka. Ma el i su mujer, arresivyeron los viajadores, les dyeron una kamareta, komer i bever. Pasaron la nochada. A la demanyana, antes de salir al kamino, Eliau demando al Kriador de matar la vaka. Rabbi Yeshua, enkantado penso: “Kualo!? Estos poveretos mos arresivyeron, i por rekompensa, el Profeta kijo la muerte de sus unika vaka!”.. Sin desharle tyempo de avlar, el Profeta ke aviya remarkado el enkanto i la revolta de su kompanyero, le disho: “No te olvides la kondisyon ke te empozi!..” Kaminaron diya entero, batyeron a la puerta de una kaza. Malgrado su rikeza, el balabay no les sirvyo ni komer, ni bever i los echo en el kortijo, ande la pared estava para derrokarse. El Profeta, rogo El Kriador i la pared fue de vista adovada.
Otruna vez, Rabbi Yeshua se revolto, ma kedo kayado. A la tadrada, arrivaron delantre de una Sinagoga manyifika, atestiguando la rikeza de la komunidad. Demandaron azilo. Dinguno se mostro dezeozo de ayudarles. Les dyeron un poko de pan, sal i agua. Fue egzaktamente ansi ke Eliau i su amigo fueron tratados por esta djente rika… Durmyeron ensima de los bankos de la Sinagoga. En partyendo, al grande enkanto de Rabbi Yeshua, El Profeta disho “ Sueto ke los Sielos rekompense esta Komunidad en azyendo a todos shefes ”.
A la tadrada arrivaron a una sivdad, ande fueron arresividos kon entuziasmo i onores. Se kedaron en una ermoza kamareta, komyeron i bevyeron. En partyendo, Eliau los bendisho: “ Ke los Sielos vos aga sujetos de un buen i uniko lider ”. Ensima de esto, Rabbi Yeshua no pudo mas detenerse “O Profeta! Tu komportamyento esta depasando mi entendimiento. Te rogo ambezame la razon de esto todo. “Bueno, te va eksplikar i mos vamos entonses espartir . Savelo ke el Andjelo de la muerte estava en la primera kaza, i le ize trokar su objektivo ke era la vida del ombre. Lo ke te paresyo katastrofa, era en realidad una bendisyon”.
“Vinyendo a la pared derrokada... aviya debasho un trezoro. La ize adovar, por impedir el rikon de azerse mas riko. El trezoro kedo debasho la tyerra, i ansi kastigi esta persona sin korason, no le ize favor. Vinyendo a las personas de la Sinagoga, les sueti de ser todos shefes. Ay una dicha ke dize: “Munchos kapitanos i la nave se unde”… Un pais ke tyene munchos shefes, korye a la katastrofa, a su malor. I a la kontra, a los otros ke mos arresivyeron tan bueno, les sueti uniko shef. Ben Sira deklara “Oroza la sivdad ke tyene un solo dirijente sezudozo”…
Antes de alesharse por entero, el Profeta Eliau le disho a Rabbi Yeshua de entender bien sus palavras. “Si ves un djusto en mizerya, no tengas dubyos sovre la djustisia del Kriador. Dinguno deve pruntarle “ Kualo estas azyendo?”… Sovre estos byervos, Eliau bendisho su kompanyero i desparesyo…
Contes et Légendes d’Israel
