Alhad pasado, un terrivle terremoto de una fuersa de 7,2 destruyo multiples edifisyos al Este de muestro payis, en Van i su entorno, kavzando a lo menos 459 muertos i 1360 ferridos.
Segun lo ke mos ambeza la prensa internasyonal, el lavoro de ‘salvasyon de los ke kedaron debasho las ruinas’ empeso kaji immedyatamente. Los “Servisyos adekuados Turkos’’ mandaron de urjensya ambulansyas i aeroplanes de primer kudyo, ansi ke todo modo de produktos sanitaryos menesterozos, ma la desgrasya syendo muy grande, las otoridades lokales reklamaron tambyen, de urjensya, un ayudo suplementaryo de payizes vezinos.
El diaryo elektroniko Fransez “Le Figaro” mos dize ke malgrado el litijyo ke malorozamente obskurese desde un syerto tyempo las relasyones de amistad entre los dos payizes, İsrael propozo sin tadrar a la Turkia ‘espesyalistos i materyal de primer kudyo’ afin des partisipar a la salvasyon de los ke se topan ainda debasho montones de pyedras.
Shimon Perez demando personalmente a su Homologo Turko de akseptar la partisipasyon de Israel afin de pueder akudir lo mas posivle de ferridos en estado de urjensya.
Los terremotos devinyeron malorozamente de mas a mas frekuentes, espesyalmente al Este de la Turkia ke se topa sovre plakas tektonikas en perpetual movimyento, i ansi la importansya de ‘moradas o kualker otras konstruksyones espesyales’ se aze de mas a mas sentir.
Partisipamos todos a la dolor de los ke pedreron en esta desgrasya myembros keridos de sus famiyas. El Dyo ke les mande pasensya ansi ke la fuersa menesteroza de soportar sus sufriensa i ke El proteje muestro ermozo payis ke, komo es evidente, devino un egzempyo politiko de governansa a segir en el Serkano i Medyano Oriente.
