Ke sera despues del triumfo,

Si, el puevlo Libyano grasyas a su koraje i al ayudo de unos kuantos  payizes evropeos ansi ke del Otan, salyo definitivamente de una larga epoka  de opresyon i agora  empesa para el, el difisil lavoro de la rekonstruksyon.

Grandes komentadores i djornalistos mos dan sus opinyones a este sujet...los unos mas o menos optimitos los otros perpleksos  muy perpleksos...munchos mizmo kondenan amargamente los konkistadores de aver personalmente metido fin a la vida de Kadafi sin averlo entregado al djuzgamyento de una Otoridad Judisyal.

Todos savemos  ke el puevlo Libyano no es un Puevlo homojeno kon un mizmo Pasado, una mizma Historya i un mizmo Ideal...Meskla de trivos por la mas parte beduinos, kada uno ‘diferente en su konstitusyon’ tyene su proyekto, sus aspirasyones i fatalmente su dezeo de potensya.

Despues de 42 anyos de diktatura debasho la governansa de un tirano ke penso unikamente a enrikeserse personalmente i a protejar los myembros de su solo klan al detrimento de los otros, el Puevlo Libyano bive en este momento la alegria de pueder librement eskojer su futuro, sin tener syempre el ovligo de abokar la kavesa delantre una voluntad ke no sera la de su mayoria. İ munchas kestyones vyenen al tino:

Eske los ke fueron oprimidos sin ser libres de sus desizyon, puedran asumir la difisil responsabilidad de la libertad?

Eske van a pueder renunsyar a  algunas de sus propyas revendikasyones, afin de no danyar los derechos de los otros?

Eske puedran sovrepasar las vyejas rivalidades ke los ensanyavan los unos kontra  los otros i ayegar enfin a un  estado de entendimyento mutual?

Eske, malgrado sus rituales i uzos ansestrales de beduinos auzados a ser syempre en estado defensivo, eyos  puedran dominar sus refleksos de azer personalmente djustisya, i  konfiar  esta misyon a las altas instansyas judisyales eskojidas demokratikamente por el puevlo?

Es ke puedran  sometersen a las egzijensyas etikas de un “estado de derecho”?

Es ke van a tener la sagasidad  de deshar a los mas sezudos (eskojidos libremente) la karga de reorganizar la jeransya del payis?

Enfin, es ke los kampos del payis van a ser sembrados de trigo i avena i no enkonados de sangre?

El filozofo Bernard Henri Levy ke fue uno de los primeros a sostener el puevlo libyano en su lucha para la libertad, disho tekstualmente lo sigyente:

“La Historya djuzga tambyen el vensedor de una gerra i sovre todo de una gerra de liberasyon, segun su manera de komportarse kon sus adversaryos vensidos, kualas  sean las sirkunstansyas, la dureza de los kombates i mizmo la evidensya de las faltas inhumanas del kampo enemigo.”

Alhad el 23 Oktobre 2011, el prezidente del “CNT” Mustafa Abdel Jalil  deklaro “la liberasyon total de la Libia, fundada sovre las valores de la “Sheria” i  deklaro ke  todo modo de  ley ke  las violara  sera legalmente konsiderada komo manka de valididez.