El 29 Oktobre del 1947, aparesyo el “Şalom” por primera vez, debasho la direksyon del Sr İzak Yaeş i del Sr. Avram Leyon, administrator, eskrivano prinsipal, responsavle de la “mizanpaj”i distributor. El fue TODO... “Şalom” es uno de los ralos jurnales ke reusheron kedar en pyes un largo tyempo semejante. Suetamos de korason ke kontinue ansi.
29 Oktobre, oganyo es el 64. anyo de la primera publikasyon de muestra Gazeta. Un aniversaryo reelmente importante. Para mi el “Şalom” es muncho mas ke un simple jurnal, o un kualkyer papel. Syempre fue i oy en diya es komo un kompanyero ke mos en grandesimos endjuntos, ke kontinuimos los anyos endjuntos. Es tambien en una manera el rekuerdo de mis anyos de adolesensya, de mis rekuerdos de Galata.
Ay mas de 10 anyos, mi jurnal tyene un lugar mas importante en mi vida. En todo kavzo, mi atamiento al “Şalom” lo puedo nombrar komo “fidelidad”, i esto muy sigura ke no esto egzarendo. Desde el presipyo, en diversas periodas, muestros kaminos se kruazaron. No solo en tal ke lektora o eskritora en el jurnal, ma de muncho mas antes...Tornaremos al anyo 1947…
En el imoble ke me engrandesi en Galata, eramos vizinos kon Avram Leyon i su espoza la Sra. Sofi Leyon (en paz ke repozen). Eran de la edad de mis djenitores, de sorte ke mi Papa (de b.m) i el Sr. Leyon se entendiyan muy bien. Me akodro ke a kada okazyon ke topavan aziyan largos moabetes, espesyalmente sovre sujetos seryozos i la politika internasyonal despues la fin de la 2. Gerra Mundial.
En realidad no es enteramente egzakto ke mos engrandesimos endjuntos kon el “Şalom”. Porke, en 1947 yo ya era una muchachika, i puede ser una adolesente un poko kuryoza!!.. Syempre sinti un grande respekto para estos dos adultos tan seryozos. Me plaziya sintir sus propozitos. En vezes, me mesklava demandando seya una koza o seya eksprimiendo mi opinion. Me paresiya inkreivle ke dos ombres ke konosyeron tantas difikultades me respondan kon tala pasensya…
Myentres el prosesus de aparejos del “Şalom”, el Sr. Leyon enkontro grandes difikultades, mizmo syertos impedimyentos. Esto no lo izo aboltar de su kamino, i eksprimio la situasyon kon estos byervos: “No kero repetar las sufriensas ke pasimos myentres los anyos pasados... Malgrado las presyones ke mos fueron echas, no mos desviyimos del kamino ke mos trasimos mizmo en los momentos los mas eskuros... El amor por servir muestra kollektividad mos dyo una fuersa por kontinuar la misyon ke empesimos i mos kontentamos en este chiko formato de kontinuar a azer apareser regolarmente este chiko jurnal...”.
Avram Leyon era un vero luchador. Yo me topo en pozisyon de pueder konfirmar estas difikultades, syendo testigo de las konversasyones ke aziyan kon mi padre. Malgrado todas estas difikultedes ke konosyo, vide la ferma rezolusyon de Avram Leyon para kitar esta Gazeta. No me olvido los byervos de mi padre en akeya epoka kuando le diziya al Sr. Leyon: “Karo Avram, estas entrando a un kamino espinozo. Ma, kon tu imensa perseverensya, esto siguro ke vas a reushir”…
El “Şalom”, debasho la direksyon del Sr. Leyon aparesyo asta el 1984. Kontinuo su kamino, syempre kon el eslogano “A lo tuerto tuerto, a lo derecho derecho”, i oy arrivo a su 64. anyo. Oy en diya es el uniko organo de prensa de la Komonidad Djudia de Turkiya… Un amigo Fidel a sus “rendez-vous” semanal desde 64 anyos.
Yo, sin falsa modestiya puedo pretender ser una de las pokas personas en vida, ke tuvyeron konosido la primera aparisyon del jurnal. Puedo mizmo adjustar ke yo, una muchachika a la epoka de su primera aparisyon, fui en una manera testigo de su nasimiento. İ esto para mi tyene una importansa partikolara. Es un rekuerdo presyozo al lado del privilejyo de apartener tambien a la ancha famiya “Şalom”… En terminando mi teksto, sueto a muestra gazeta munchos otros anyos de reushidad.
Oktobre 2011-Estambol
