De muevo la muerte, de muevo la dolor i el odyo en Bingöl, al Este de muestro Payis. De muevo simples sitizanos, ombres i mujeres fueron arrankados a la vida.
La semana pasada en el sentro komersyal mizmo de Bingöl, delantre una botika, una mujer ke se topava aya por hazardo para empesar a azer sus empleos de Bayram, vyendo un terroristo pronto a perpetrar su akto infernal, se echo espontaneamente sovre el maldicho matador afin de empidir el dezastre fatal.
Djesto sublime, djesto de bravura i de abnegasyon personal ke le kosto la vida ma reduzo de uncho la dimensyon del akto inyovle ke se limito a 3 personas muertas i 21 ferridas.
Sea lo ke sea para el, la importansa de la Kavza por la kuala el akto fue perpetrado, maldicho sea el matador el kual afin de salir kon lo suyo, tuvo la desgrasyada ozadia de travar a la papa syega sovre inosentes, i bendicha por syempre sea la simple sitizana ke izo todo su posivle para evitar un rezultado ainda mas trajiko i dolorozo.
Ningun preteksto puede djustifikar un akto de muerte, el es una indjurya enverso la humanidad i sovre todo enverso Dyo el mizmo en la sakralidad de su ovra.
