Los ultimos shifros de la desgrasya del seizmo de Van son malorozamente de 582 muertos i 4152 ferridos.
‘582 muertos’ sinyifika mas de mil famiyas en dolyo, madres i padres en la amargura, ninyos sin verdadera proteksyon ni esta inegualavle kayentor ke solo prokura los brasos de una madre.
El kudyo del Governo komo de los kompatriotes de kualkyera sivdad, fue enorme i kontinua ainda, el de varyos payizes vezinos komo leshanos, tambyen. La gazeta ŞALOM mando, eya, un grande kamyon-tir yeno de kashas de botilyas de agua potable ke fue entregado al Kızıl Ay de Erciş.
Los terremotos komo los sunamis eran al tyempo konsiderados de la parte de munchos de entre muestros avuelos, komo dekretos selestos, ma en realidad eyos son simples fenomenos naturales ke se produzen al interyor de la tyerra i ke puede ser un dia la Syensya puedra preveer de muncho antes.
La sola koza ke aktualmente el Governo puede azer es simplemente de asegurar a todos sus sitizanos “moradas adekuadas, reziztyentes a semejantes perturbasyones” i syempre syempre entre mozotros la solidaridad i el ayudo mutual.
