Despues la euforia de la semana pasada konsernando la impekavle votasyon a la kuala partisiparon libremente 90 por syen de los Tunizyanos en edad de azerlo sin ser ovligados , ni sin el mas chiko orden o konsinya de ken ke sea, la Prensa Internasyonal esta oy en dia un poko ezitante i mizmo perpleksa a la sigida del anunsyo del rezultado definitivo de la dicha seleksyon, rezultado ke mos ambeza kel partido Ennahda resivyo muncho mas votos ke lo ke se pensava i kel futuro kodigo judisyal del payis se inspirara de los preseptos de “la Sharya”.
El diaryo “Le figaro” publiko el teksto de una entrevista ke uno de sus gazeteros izo a este propozito kon el Profesor Mathieu Guidere, de la Universidad de Toulouse, grande espesyalisto del mundo Arabo-Muzulman, el kual ekspliko lo sigyente:
“La Tunizia komo la Libia biven en este momente un djenero de normalizasyon. Estos dos payizes eran governados por un rejimen politiko en mizmo tyempo nasyonalisto i laiko ke praktikava un modernizmo por ansi dezir progresisto, errensya de sus kontaktos kon el Oksidente.
Ma los puevlos eyos, avian kedado mas o menos fideles a la ideolojia Muzulmana i a una kultura araba. En este momento mos topamos delantre un retorno de los dirijentes al imajen del puevlo.
En todo kavzo la “Sharya” en el aghreb no tyene ningun punto komun kon la “Sharya”de los talibanes del Afganistan. Todos los movimyentos İslamistos Sunites entendyeron durante los ultimos 20 anyos, ke no puede aver un rejimen Islamisto impozado por la fuersa”...
De su parte, en el semanaryo “Le Nouvel Observateur” Pascal Boniface (Jeopolitiko Fransez, ensenyante en la Universidad Paris VIII, myembro de varyos konsilyos konsultativos i editoryalisto de nombrozas revistas internasyonales) mos eksplika ansi la situasyon:
“Es importante de no azer un amalgamo entre la Tunizia i la Libia. En Tunizia uvo una revolusyon popular sigida de una eleksyon demokratika, en Libia uvo el destronamyento de un diktator a la sigida de una gerra sivil kon el ayudo de armadas estranjeras.
De mezmo, el estatuto de la mujer, ansi ke la relasyon a la Laisidad son enteramente diferentes en los dos payizes.
Tambyen no se puede azer un amalgamo entre los salafistos ke protestaron kontra el filmo “Persepolis” i el partido Ennahda ke tuvo un sukseso inesperado.
De otra parte, el rezultado final de la votasyon fue el de la libre seleksyon de la mayoria de los Tunizyanos i las reglas de la demokrasia mos ovligan de akseptarlo.
Por el momento el partido Ennahda prometyo de respektar las libertades akordadas por los partidos presedentes, ‘’de no interdir estriktamente la konsomasyon de alkol’’ i ‘’de no ovligar las mujeres a yevar absolutamente el velo...’’
Mizmo si es probable ke puede aver un doble diskorso de su parte, sera difisil para este partido de komportarse otramente, no solo por fidelidad a sus promesas, ma siplemente por el impakto nagativo ke esto puedra ser sovre el turizmo, el kual es de una importansya vital para la ekonomia del payis.
Un otro punto muy importante : aunke Ennahda es el primer partido de la seleksyon, para pueder governar, el se topa en el ovligo de krear un koalisyon kon otros partidos.
El sukseso de Ennahda se puede mas o menos eksplikar por el fakto ke el fue syempre el prinsipal ‘oppozitor historiko’ de Ben Ali.
Por kontra puedemos ser muncho mas anksyozos por la Libia; el anunsyo del restablesimyento de la poligamia parese ser bastante inkyetante. I lo ke es lo mas grave fue las kondisyones dezastrozas de la muerte de Khadafi .
‘Su egzekusyon presipitada en syendo pyedregado antes kualkyer djuzgamyento judisyal’ provoko (kuala sea la natura reprehensivle del personaje) un terrivle dezrepoza moral en el mundo Oksidental i de mezmo ‘la egzibisyon indesente de su kadavre’ mostra una voluntad de vengansa mas huerte kel dezeo de rekonsilyasyon..
Esto dicho, la evokasyon de la sharya no sinyifika otomatikamente ke eya sera la unika huente de inspirasyon para la kreasyon de la mueva konstitusyon....”
Ansi mas o menos avlaron dos grandes espesyalistos del mundo Arabo-Muzulmano.
