Muestro amigo Moshe Gormez mos mando un artikolo tomado de la revista Israelly Cool. Vos kero azer el rezume de este artikolo.
Aviva Shalit, madre de Gilad Shalit, (el soldado israelieno librerado los diyas ke pasimos), les telefono a sus amigos, Chana Canterman, el lunes ke pasimos, para dizirles ke Gilad vino sano i rezyo, i ke agora esta bueno de salud.
La koneksion entre las famiyas Shalid i Canterman empeso kuando la famiya Shalit empesaron a azer kampanya por Gilad, delantre la kaza del primer ministro.
Komo lo savemos todos, Gilad Shalit fue apanyado por los teroristos de Hamas, el 25 de Junio del anyo 2006, en los tuneles subterraneos, serka de la frontiera de Gaza.
Chana Canterman, i su marido Rabbi Eli Canterman fueron. unos de los volontarios ke prokuraron komidas a los Shalites, durante sus protesta.
Las dos famiyas se izieron amigos, i empesaron a vijitarsen, i rogando endjuntos al Dio, por la liberasion de Gilad.
Kada Alhad, Chana pasava oras en la kozina, en aziendo komidas savrozas por los Shalites.
Poko a poko, los Cantermanes empesaron a yevar grandes kantidades de komidas, porke kada uno ke viniya a vijitar los Shalites, les plaziya de komer las komidas de Chana Canterman.
Naturalmente, Aviva i Noam Shalid se izieron serka komo paryentes kon los Cantermanes. Kuando Chana se fue a viyajar a los Estados Unidos, le demando a Aviva kualo kere ke le trayga de aya. Aviva le disho ‘La sola koza ke kero es Shalit. No tengo menester de regalos’.
Los Cantermanes empesaron a vijitarlos tambien en las viestas relijiozas. En Purim les organizaron un pranso ermozo, i en Pesah les trusheron Matsa.
El 17 de Avril, un diya antes del diya dalkavo de Pesah, Chana le trusho un regalo espesial a Aviva, endjuntos kon la komida. El regalo era un dolar ke el Rebbe Lubavich le aviya dado, en rekomendiendole ke lo de por una koza de valor.
‘Toma este dolar’ le disho Chana, ‘i puede ser ke te ayuda a ke Gilad seyga liberado’.
Aviva aksepto el dolar, i empeso a yevarselo kon eya, a todo modo de lugar ke se iva.
‘Fue un periodo muy difisil por la famiya Shalit’ disho Chana, ‘keriyamos ayudarles para darles esperansa i fuersa en asperando ke Gilad torne sano i rezyo’:
En el mezmo diya ke los Shalites resivieron el dolar, el Primer Ministro Benjamin Netanyahu les disho a los Shalites, ke ramplaso el lugar ofisiel de Chagai Hadas, kon David Medan.
David Medan empeso a resivir repuestas mas frekuentes de los kaptivos, de diversos kanales.
En Roshashana, el Rabino Canterman vino a asoplar el shofar para los Shalites. Una semana duspues, oyeron ke Gilad iva ser liberado en Tishrei 20, en Kol Hamoed Sukkos.
Un diya duspues, Chana Canterman le disho a Aviva de mirar a la data eskrita detras del dolar. (Los Hasidim eskriven detras del dolar, la data ke lo resivieron).
Aviva Shalit, emosionada, le respondio ke el diya ke Canterman resivio el dolar, era el 20 de Tishri, diya de Martes, antes vente anyos de aki. Tambien, Gilad Shalit fue liberado por los teroristos, el 20 de Tishri, diya de Martes.
I el anyo ke el dolar fue dado, era 5751 – el anyo ke los Hasidim anonsaron komo anyo de miraklos.
