KONTİNUAMOS…

Ampesi kon una  fraza del ilustro eskrivano irlandezo. Kontinuaremos  kon el mizmo sujeto (El Amaneser No. 81). Sinti ke una grande banka internasyonal fondyo diversos Klupes de hobi. Los miembros son personas de una syerta edad, en mayoriya “retirados”. En primero toman informasyones, lisyones i kon tyempo, el “materyal” menestorozo para la okupasyon de sus preferensya. Entre otros puedo sitar komo hobi: Pintura sovre tavla, jardinaj (okuparse de guertas, plantas), seramika, dans, tenis, brich, muzika, patiseriya, dizanyo de “bijuteriya imitasyon” o ambezar linguas ajenas ets..

Komo lo savemos, i koleksyonar es un hobi enteresante i pasyonante. Afilu, de syertos puntos de vista es tambien instruktivo. Los espesyalistos dizen: “Antes de todo trankiliza la persona, la alesha del stres. Tambien tyene otrun avantaj. Por egzempyo, si par azardo se da un entervalo a koleksyonar, se puede de muevo kontinuar del mizmo lugar..” Asigun entendi, no es komo el spor o la muzika, ande se enkontra un syerto negativizmo si se desha de pratikar.

Yo se ke koleksyonar es arrekojer objektos, piesas enteresantes ets.. teniendo partikolaridades komunas o syendo de mizmo djenero. Portanto ay personas ke konosko. Arrekojen objektos inimajinavles, egzaktamente komo uzavan  a dizir mis nonas, “arrekojer lo seko i vedre”!!... Es esto koleksyonar??. No penso ke es ansi. İ kuando les demandas la razon, responden: “Puede ser ke es lokura ma, esto todo es presyozo para mi, i no me kidea de echarlo..”. Bueno, a  mi no me kaye de komentar!...

Naturalmente, koleksyonar seriozamente, de manera, diremos metodika, es enteramente otra koza. Un tal koleksyonador save ke   kontinualmente deve okuparse de su koleksyon, al menester alimpyarla i konservarla en buen estado. Esto, a lo menos, le aze ganar las kualidades de ser dishiplanado i ordenado. 

Siguro ke estamos tratando de una jeneralidad. Dependyendo  del djenero o de las partikolaridades de la koleksyon,  la persona se ambeza syertas kozas,  gana syertas konosensyas. En este kuadro se puede sitar los koleksyonadores de timbros (filatelia) i los ke se enteresan a las piesas de moneda (nümismatik). Un filatelista por egzempyo, se esta bastante informando sovre los personajes o la data de los eventos istorikos ke se prezentan en los timbros de las emisyones espesyal. Se esta ambezando diversas nosyones jeografikas ets…

Me parese ke ya avlimos bastante de koleksyon. Ampesi mi teksto  kon los hobis de los retirados porke kije kedar en el kuadro de las palavras del Sr. Shaw. Aserkando del final, kero tornar de muevo a los hobis en jeneral i a los ke lavoran. Uno lavorando en kualkyera seksyon teknika esta preferando hobis konsernando la komputadera, i el Internet. Los ke estan en el domeno de vendidad o komo se dize aktualmente, en el “Marketing”, estan dirijandosen en jeneral, verso hobis dando la posivilidad de estar en relasyon kon mas muncha djente. Entre estos puedemos sitar la fotografiya, natasyon (posivle el anyo entero en pisinas serradas), lesones de diversas dansas ets...

En lo ke konserna la dans, esto ya lo esto vyendo i yo . Enfrente de mi kaza ay un “studyo de dans i spor”. Las tadres, grupos de muchachas i mansevos estan “ambezandosen estas muevas, o vyejas dansas komo el tango i otros... Las demanyanas esto vyendo damas de una syerta edad vinyendo al spor.

Estamos enkontrando tambien hobis muy diversos, afilu sorprendyentes. Por egzemyo, muchachas enteresandosen a spores fuertes i ke azen pujar el “adrenalin”. Otro egzempyo, ombres eskrivyendosen a korsos de “kozinar” ets.. A la verdad dizir, esto no es tan estranyo. Komo ya es savido, los “shefes” famozos en el domeno gastronomik son en jeneral ombres..

İ yo esto konvensida ke el “Hobby” atraza la vejes. Ke dizish keridos amigos?..