Prof. Dr. Orhan N. Ulutin fue elevo i asistante prinsipal del Ord. Prof. Dr. Erich Franck, uno de los famozos ombres de sensya Judios de Alemanya, ke fueron invitados a la Turkiya en la perioda del nazismo.
En eskapando sus estudios en la Fakultad de Medisina de la Universidad de Estanbol en 1947, Ulutin empeso su karyera brilyante komo asistante prinsipal de su profesor Erich Franck, i es konsiderado komo el “padre” de la hematolojiya en la Turkiya.
Entre sus multiples premyos i titolos onoraryos, se deven mensyonar:
1964 Premyo syentifiko Eczacıbaşı
1970 Premyo syentifiko TÜBİTAK
1991 Premyo syentifiko de la Asosyasyon Medikal de Estanbol
1997 Myembro Onoraryo de TÜBA (Türkiye Bilimler Akademisi)
2001 Medalya de Onor de la Universidad de Estanbol
2002 “Lifetime Achievement Award” de International Union of Angiology
En 2005, resivio el titolo de “Lifelong Honorary Member” de la ISH (International Society of Hematology).
En 1963, fue invitado komo “Visiting Scientist” a la Universidad de Tel Aviv.
Era myembro de 17 Asosyasyones i entre los fundadores de 4 de eyos.
Organizo 17 Kongresos i Sempozyos Internasyonales de estas Asosyasyones, trayendo mas de 7000 ombres de sensya a la Turkiya. Los livros de estos Kongresos fueron todos publikados.
Lavoro komo editor de munchas publikasyones profesyonales.
Era kazado kon la Prof. Dr. Şengün Balkuv Ulutin i padre de dos ijos, Prof. Turgut A. Ulutin i O. Timur Ulutin.
