Si, dia de dolyo i de dolor, ma tambyen dia de afirmasyon irrefutavle del ‘’Jenosidyo Djudyo’’, prova inkontestavle kontra la mentira kolosal del negasyonizmo, dia ande la humanidad se syente o (por avlar de una manera mas realista) devra sentirse desmamparada delantre la horror de un krimen kolektivo perpetrado sin razon ni verdadero motivo …
Dekretado por el konsilyo Evropeo “este dia internasyonal de la komemorasyon de la Shoa” ovliga kualkyer persona, djudia o no djudia, a demandarse kualo es el ombre? kualo es la sivilizasyon? kualo es lo ke yamamos “la konsyensya”? kuala es la superyoridad de la rasa humana en raporto kon la animala mas ekilibrada en sus aktos i reaksyones?
Dia de konsternasyon tambyen, durante el kual ninguno es kapavle de responder a la kestyon’’asta ande puede ir el odyo i el dezeo de eksterminasyon del otro’’ de la parte de un ego monstruozo entregado a la violensa de su terrivle voluntad de afirmar absolutamente su supremasia?
La kestyon keda la mas parte del tyempo sin verdadera repuesta. En el orgolyo de ser ‘kriansas pensantes’, kreemos munchas vezes ke un dia todo mos sera posivle … vanas iluzyones, esperansas peligrozas.
Una sola koza mos es demandada en este mundo ‘’sentirmos responsavles de esta chika porsyon de tyempo ke mos fue akordada , ser dinyos de la posivilidad ke mos fue ofrida de pueder pensar, djuzgar i en konsekuensa komportarmos.
A este propozito, kero kontar uno de entre los miles i miles epizodyos de esta epoka trajika ke fue la segunda gerra mundyal, un epizodyo ke parese esta vez yevar en el komo una imperseptivle esperansa, la persona ke lo bivyo (una mujer ke muryo ay de esto unos kuantos anyos i ke me era muy serkana) me lo konto eya mizma….
Aunke de orijen djudia poloneza ,eya tenia fizikamente la aparensya de una pura aryana, blonda, los ojos blus, la kara redonda, el kuero klaro. Al empesijo de la gerra, despues de aver visto sus tres ermanos i su ermanika arrestados i yevados a una destinasyon deskonosida, una noche la milisya poloneza batyo a su puerte para tomarla a su torno.
Malgrado la yelor del tyempo, la metyeron kon munchas otras personas del venzindado en uno de estos kamyones avyertos ande se transporta bestyas, vakas o kodreros, todos en pyez sin el mas chiko espasyo ande meterse dekuklias; eya estava serka del bodre, el puerpo ekspozado al ayre violente ke soplava. Los dos guardyenes ke los akompanyavan se avian avrigado ,eyos, en la kabina del konduktor, avlando i riendo entre eyos.
El kamyon iva presto en los kampos vazios empapados de luvya. La noche era oskura sin lunar ni estreas, el frio paresia modrer los puerpos temblando de los desmazalados, niguno de entre eyos savia egaktamente ande los yevavan…solo de vez en kuando se oyia un djemido.
İ en supito, en la lokura de la manseves, sin ke eya mizma realize las konsekuensas ke puedia tener su djesto, la persona ke me konto el fakto salto ahuera del kamyon, una dolor terrivle serka de la talya la desho imovivle durante un largo tyempo ma lo ke yamamos “instinkto de konservasyon” la pusho a alevantarse i a koryer sin saver ande ir … A un syerto momento eya vido una chika luz leshos, muy leshos …tuvo el koraje de kaminar asta eya ,era la botika de un vendedor de bevyendas ke estava sovre el punto de serrar…aedado de kaji 60 anyos, bruno, los kaveyos grizos, el la miro kon suspisyon … “ke azes la noche a estas oras en este lugar aislado? Yo vendo de kualo komer i bever a los konduktores de kamyones”.
Eya no respondyo, el immedyatamente ya entendyo “sos djudia?” i sin asperar la repuesta de la mansevika, disho: “entra, tenemos arriva tres kamaretas, mi mujer esta durmyendo en este momente … amanyana se lo digo, ma tu no le vas nunka nunka revelar ke no sos aryana” .
La detuvyeron ande eyos asta la fin de la gerra i despues fue el verdadero kaos para el payis debasho la dominasyon sovietika i para Hanka, muncho mas tadre, la alegria de krear una famiya.
