En Fransya no ay ‘un voto djudyo’, ma una sensivilidad a dos sujetos : “la pozisyon del payis konsernando Israel” i “el antisemitizmo”. No fueron kombidados al Pranso anual del Crif, los responsavles de los partidos hostiles a Israel . Dezeo azer akodrar ke el Hamas no es un movimyento de asistansya sosyal, komo varyas personas keren azer kreyer, ma un djenero de nazizmo ke rekomenda la eksterminasyon de los djudyos. Richard Prasquier (Prezidente aktual del Crif)
El Pranso anual del Crif (Conseil Représentatif des Institutions juives de France) myerkoles pasado el 8 del mez koryento, fue partikularmente reushido i riko en chikos i grandes eventos muy sinyifikantes…
Muchas grandes personalidades de Fransya, de varyos kampos de aktividad politika, literarya, artistika, djornalistika ets.. estavan prezentes, entre las kualas el Prezidente Nicolas Sarkozy ke vino akompanyado de los paryentes de Gilad Shalit, el kual avia sido retenido kaptivo durante 5 anyos a Gaza de la parte del Hamas i hue liberado el 18 oktobre del anyo 2011 kontra mil prizonaryos Palestinyanos.
Segun lo ke eskrivyo la Prensa Franseza, dia de myerkoles el 8/2, Aviva, Noam i Gilad fueron resividos por Nicolas Sarkozy el kual avia sido muy aktivo i avia luchado kon ardor para la liberasyon del soldado Shalit.
Myerkoles la noche, solo los paryentes del eroe İsraelyano estavan prezentes. A este propozito su padre, despues de aver agradesido la Fransya por su partisipasyon ardyente en favor de su ijo, disho: “Gilad no puede ainda partisipar a eventos de una semejante importansa, el deve re-ambezarse progresivamente a bivir entre mozotros.”
Al pareser, Gilad Shalit bivyo momentos muy, muy duros en su kaptividad i komo se entyende byen salyo de este terrivle akontesimyento, profundamente ferido moralmente i psishikamente.
En su diskorso ,el Prezidente disho: “La prezensya de Gilad sovre muestro territoryo es una grande emosyon para mozotros todos los fransezes… Gilad fue persekutido, maltratado i torturado. Arrankaron a sus paryentes un manseviko de 20 anyos. Vergonya a los ke izyeron esto, nada puede djustifikar este akto barbaro”
En este diskorso de kaji medya ora sin ninguna nota eskrita delantre de el, Sarkozy avlo del antisemitizmo, de İsrael, i de los Palestinyanos... El tomo komo egzempyo ‘la Fransya i la Almanya’ ke en el pasado se avian echo durante un largo tyempo la gerra, i ke malgrado esto, parvinyeron a konstruzir kompromisyos afin de azer la paz, i ekspreso su dezeo de ver Israelyanos i Palestinyanos ayegar enfin a la mizma situasyon.
El kontinuo en konstatando ke el Kuartet “Onu, Unyon Evropea, Rusia i USA” no reusho; kale entonses trokar de metodo para traer de muevo İsrael i los Palestinyanos a la meza de negosyasyones i sovre todo azersen konfiansa los unos los otros’’.
El formulo la kestyon “Ken deve empesar? ken deve azer el primer paso? - Es ke el primer ke va tender la mano sera konsiderado komo ‘bovo’? No, un Estado Palestinyano demokratiko, viavle i moderno es la sola garantia de seguridad para İsrael.
El no manko de anyadir ke ’’la akizisyon de la arma atomika de la parte del Iran es inakseptavle, ma ke la solusyon no es un konflikto militar, el kual sera un drama ke azera sufriir una populasyon ke no es responsavle”.
El Pranso anual del Crift fue tambyen la oportunidad de kambyos de palavras kordyales entre Nicolas Sarkozy i el Kandidato sosyalisto François Hollande . Kuando el prezidente retorno a su meza despues su diskorso, el responsavle sosyalisto ke se topava en otra meza se alevanto para ir saludarlo. İ los dos adversaryos se avlaron amigavlamente.
Ansi se paso el afamado Pranso anual del Crif, evento sosyo politiko i tambyen mundano, ande kon sonrizas i konvivyalidad munchas kozas fueron dichas i puede ser, munchos problemas puedran topar ansi una posivilidad de ser solusyonados.
