Muestra kolega Esther Yannier ke asistyo personalmente a la seremonia de komemorasyon de las 760 viktimas de la Nave Struma undida en la Mar Preta, ay de esto 70 anyos, mos konta en todos sus detalyos este triste, muy triste rekuerdo.
En lo ke me konserna, visto mi edad muy avansada, no pude asistir fizikamente, ma me imajino la emosyon ke fue la evokasyon muy doloroza de estos dezmazalados, ombres i mujeres en situasyon de perikolo seguro de eliminasyon en sus propyos payizes, ke kijeron topar refujyo en espasyos mas klementes de paz i humanidad, ma ke un destino muy kruel pusho ineluktablemente verso la muerte.
La seremonia en kestyon fue organizada Vyernes el 24 del mez koryente, delantre el Monumeto de Atatürk en Sarayburnu i varyas personalidades komo İshak Alaton testigo del terrivle drama, Zülfü Livaneli autor del livro “Serenad” ke trata del mizmo sujeto i Sami Herman prezidente de la Komunidad Djudia de Turkia tomaron la palavra para ekspresar la doloroza konsternasyon ke provoko este trajiko akontesimyento, el kual kedara syempre en el la memorya de munchas personas komo un punto de interrogasyon dramatiko.
Muestro dever de sovrebivyentes mos ovliga de nunka olvidarmos de las viktimas. Ke la alma de kada una de entre eyas repoze en paz i ke muestro puevlo ferrido tantas i tantas vezes yege enfin a un estado permanente de paz i seguridad.
