Ay livros ke no solo mos ambezan munchos muevos detalyos ke no konosiamos sovre kualkyer sujeto ke mos interesa de serka, ma ke tambyen mos pushan a pensar i a formular kestyones de mozotros para mozotros. Esto fue el kavzo del ultimo livro de Naim Güleryüz ke tuve el grande plazer de resivir la semana pasada de la parte del autor el mizmo.
Por seguro ke, en el espasyo de dos a tres dias, no topi el tyempo menesterozo de meldarlo atentivamente en su totalidad, ma de simplemente echar una primera mirada ke se puede mizmo yamar superfisyal, ma ke me izo entrever su importansa i la kualidad de una analizis perfektamente objektiva, bazada sovre elementos otentikos.
El autor empesa a darmos de una manera muy klara, sovre baza de los vestijyos ke los arkeologos toparon durante sus ekskavasyones debasho la superfisia de la tyerra, provas tanjivles de la prezensya de djudyos, mizmo byen antes ke la era Kristyana, en la Asya Minor (Anadolu Yarımadası), serka de la mar Ejeana .
Esto dicho, este livro konstitue, antes de todo, una larga pintura istorika de lo ke fue la estadia de muestros antepasados sovre las tyerras Anatolyanas desde aproksimativamente el kuatren siglo de la era Kristyana, a partir de la epoka del “Imperador Arkadius“ durante la kuala, malgrado las leyes muy favoravles a los djudyos promulgadas de la parte del Monarko el mizmo, munchas de entre eyas fueron leshos de ser aplikadas por sus kolavoradores i su mujer eya mizma.
A este propozito, se puede supozar ke uno de los faktores de disidensya durante largos siglos entre djudyos i kristyanos fue el esforso de prozelitizmo kristyano ke kaji syempre kedo sin rezultado serka del puevlo djudyo, el kual (en la grande mayoria de kavzos) refuzo de trahisar su fey en favor del Kristyanizmo.
En sus varyos livros, Naim Güleryüz tuvo i tyene syempre el kudyo de observar una total objektividad i de djuzgar kualkyer situasyon en tomando en konsiderasyon los antesedantes de kada kavzo, lo ke rende sus eskritas muy profundas en sus analizis.
Al pareser, para el autor “el pasado” no es un tyempo revoludo, enteramente serrado... El mos ensenya ke munchas vezes, es primordyal de referarmos a los tyemepos ansyanos, afin de entender en su total realidad, el estado de los eventos aktuales i en mizmo tyempo afin de pueder projektar en el futuro la vizyon de un mundo manko feros en su evolusyon.
En efekto, el pasado mos ambeza muncho, a la kondisyon de no devenir una referensya estatika no evolutiva... ma al kontraryo un promotor de adelantamyento.
En este superfisyal golpe de mirada sovre este livro, ke fue el miyo en el espasyo de dos o tres dias, topi munchos puntos de apoyo a la eternal kestyon ke es no solo la muestra, la de djudyos de nasimyento, ma tambyen la de munchas otras personas de konfesyones diferentes “kualo mos desferensya mozotros djudyos,de los otros?”. Esparzido desde siglos en las kuatro partes del mundo, kuala es la razon de baza de la perenidad del djudaizmo? Kestyones a las kualas es difisil de responder.
İ enfin kuala fue a traves los siglos, desde la destruisyon del segundo Templo, la natura de las kondisyones de vida en varyos payizes, de estos relativamente chikos grupos de personas sin tyerra propya, diferentes mizmos entre eyos, ma atados los unos a los otros en sus kreensas komun, komo en sus manera de ser.
Espesyalmente desde la Edad Medya, se observa en la varyedad de las perigrinasyones durante el egzilyo del puevlo djuydyo, despues la ekspulzyon de muestros avuelos de la Espanya, munchas epokas largas o kurtas de akolyo (resivo) en varyos lugares ajenos sigidos de rejektos despues de un kualkyer tyempo de estadia, tal ke fue en la İtalya komo en la Fransya, fenomeno ke no se produzyo nunka en el İmperyo Otomano ke era, el, una inmensa mozaika de komunidades diferentes, kada una kon sus propyas kostumbres, paradigmos i preseptos, kaji otonomas judisyalmente en sus kestyones interyores, sometidas byen entendido a syertas ovligasyones, ma nunka absolutamente menospresyadas .
Por seguro ke uvo envezes friksyones inevitavles, lo ke se ve munchas vezes en kualkyer famiya sosyal, ma nunka un rejekto definitivo, ni una tentativa de impozar las kreensas del payis a los ke resivyeron sus hospitalidad.
Esto, a mis ojos, es un punto muy importante ke me revelo el livro de Naim Güleryüz, livro (lo repeto) bazado sovre elementos verdaderos, ke mos pushan (komo lo dishe al empesijo) a pensar i a refleshir.
Me permeto de rekomendar este livro a los lektores del Şalom ...el vos azera entrever munchas realidades ke envezes no son vizivles sin una semejante analizis.
