Despues ke meldi la oja judeo-espanyol de vuestro jurnal del 8 Febrero, me desidi de eskrivir este teksto. Entendi ke ay pokos ke eskrivan en muestra lingua para el Şalom. Yo no so eskritor. Portanto, antes unos kuantos anyos, enkorajado por mi ermana, ize la preva (solo una vez) de eskrivir sovre mis rekuerdos de Galata kon el titolo “Tornar”. Esto lo ize despues del viyaje de Estambol ke ize kon mi famiya, 50 anyos despues mi Aliya.
Sinti muncho plazer kuando vide en “El AMANESER” lo ke eskrivi. Se publiko despues ke los redaktores izyeron las koreksyones nesesaryas komo ortografiya, algunos byervos yerrados ets.. Ma no trokaron mas nada. Porke eran mis rekuerdos, mis sentimientos i manera de akodrarme mi chikez. Son kozas ke apartienen al ke eskrive o las konta. No se si savesh, en la radio de Paris ay una emisyon en judeo-espanyol del Sr. Edmond Cohen. En akeyos diyas me ambezi ke el meldo tambien en su emisyon de la radio el teksto miyo “Tornar”, lo ke me izo grande plazer.
Ay mas de trenta anyos ke no empleo el judeo-espanyol, de kuando muryo mi kerida madre. Siguro, no me lo olvidi. Kuando biviyamos en Galata en kaza avlavamos en Ladino. Despues ke mos fuimos a Israel, del primer diya, kon mi padre avli en Ebreo. Ma kon mi mama kontinuimos el Ladino asta el ultimo diya de su vida. Fue asi ke pude konservar mas o menos la lingua. Ma eskrivir es otra koza. Me parese ke es un, komo se dize, un regalo?.. si, un dono de los sielos.
Oy va tornar otruna vez a mis rekuerdos de antes 60 anyos o mas. Nasi en el anyo 1945 en Estanbul. Tengo ermana i ermano mas grandes ke mi. Me engrandesi en Galata. Bivimos ayi asta el 1956, anyo de muestra “Aliyah” kon mi famiya. Akeya Gerra grande eskapando kuando nasi, en kaza no kedavan de dizir ke era yo el “ugurli” de la famiya. Yo no entendiya kualo keriyan dizir. En el 1950 munchas personas de la mishpaha de mi madre ya estavan en Israel. Akel anyo yo un ninyo de 5 anyos, kon mi mama izimos un viyaje a Israel porke eya kijo ver su ermana.
Fue un mundo muevo para mi. Afilu el sol, la kalor, la atmosfera i todo me enkanto. Komo dizen los fransezes “coup de foudre” me enamori de este pais. Un amor muy grande… Mi padre i ermano kedaron en Estanbol kon mi ermana ke se okupo de eyos. Eya estava tambien estudyando. Anyos pasando, en 1956 izimos “Aliyah” kon mis padres (mis paryentes). Para mi era komo ir al “Paradizo”. No fue uy fasil. Porke la Aliya muestra teniya un punto menos orozo. Mi ermana ke era kazada i teniya bebe estavan kedando en Estanbol.
Para entender mijor lo sigiente, vos dire ke so psychologo de profesyon. Dunke, la persona es la suma de sus rekuerdos dulses i amargos. Kon el tyempo, la memorya los elabora (tanzim etmek) en syertos modos. Unos son bazados sovre la realidad. Otros en parte inventados o egzajerados. Kada uno de mozotros semos el narrativo personal, el ke konta los rekuerdos ke nesesitan testimonyo. Para mi el mas efikache (etkili) es arrebivir los rekuerdos kon la sigunda jenerasyon. İ yo sinti la nesesidad de mostrar a mis ijos “mis raizes.
En el anyo 2006, djusto 50 anyos despues mi Aliya realizi mi dezeo de vijitar kon LOS İJOS, la sivdad ande nasi. Yo i mi mujer tenemos estado ayi unas kuantas vezes. 2006 fue la primera vez ke viaji kon mis ijos i mi inyeto, bebe de un anyo akel tyempo. Tuve la okazyon de mostrarles el “territoryo” de mi infansya (chikez)… LA KULA, ke akel tyempo era yeno de famiyas djudias.
En un ermozo diya de Julio ampesimos al tur, de Taksim ande se topava muestro otel… Verso Beyoğlu (Grande Rue de Péra)…El Sinema Atlas ande ampeso mi amor de filmos. Lugar relasyonado (ilintili) kon la memorya de los diyas de Alhad kon mi Papa…
Dr. David Azikri-2012
a kontinuar....
