Segun lo ke mos ambeza la prensa oksidental, el dialogo entre Obama i Netanyahu de Lunes el 5 del mez koryente, sin ser totalmente pozitivo, marka (en este mueven enkontro) un grande aserkamyento entre los dos “Ombres de Estado” ke fueron asta agora kaji syempre opozados sovre puntos fuertes konsernando las relasyones Israelo- Palestinyanas.
En el kavzo prezente se trata de una kestyon krusyal konsernando los interesos de kada uno de los dos payizes “No permeter a un governo ekstremisto la posesyon de la arma nuklear.”
Komo el mizmo lo disho klaramente Alhad pasado al AIPAC, el prezidente Amerikano es absolutamente opozado a ver entre las manos del Iran una arma semejante. Sus palavras fueron:“Un Iran nuklearyo es kontraryo a los interesos nasyonales de los Estados Unidos...Vo utilizar todos los remedyos para impedir esto... ma tenemos ainda tyempo i espasyo para la diplomasia... por el momento todas los opsyones kedan avyertas. En todo kavzo el opoyo de los Estados Unidos a Israel en su lucha por su egzistensya, es un punto inkontestavle.”
Se puede pensar ke aktualmente, en esta kestyon, el punto prinsipal de diverjensya entre Obama i Netanyahu es esensyalmente lo ke la prensa yama “el Timing”... El eskopo de Obama es de utilizar todos los medyos diplomatikos i ekonomikos para no permeter un semejante rearmamyento del “Payis de los Mollahes”, ma luchar asta el ultimo momento para evitar (en la mezura ke esto es posivle) una situasyon militarya konfliktual ke riska de azer del Oriente Medyo un kaos inekstrikavle.
