Este anyo, el filmo ‘The Artist’ gano el Oscar del ‘Mijor Filmo i el Mijor Direktor’. El direktor del filmo, Michel Hazanavicius nasyo en una famiya judiya de Lituania i Polonya. Su famiya, mas duspues, emigraron a Fransia. Hazanavicius lavoro en munchos projes de la televizion. Fin agora, fue el dirijo tres filmos. En el filmo ‘The Artist’, su mujer Berenice Bejo tomo el primer rolo, i fue nominada por Oscar.
‘The Artist’ es un filmo silansiyozo, en preto i blanko, kon un sujeto semplo i ermozo. Mezmo siendo entero en silensio, es fasil de entender el sujeto sin dingun dialogo. La semplisidad del sujeto, permetio al direktor Hazanavicius (ke tambien eskrivio el senario), de konsantrarse sovre la emosion i el karakter.
Woody Allen gano el Oscar del ‘Mijor Senario’ por el filmo ‘Midnight İn Paris’. Aunke Woody Allen fue nominado por un total de vente i tres premios de Oscar durante su larga karyera, este premio fue el primer desde el anyo 1987, kuando el aviya ganado un Oscar por su filmo ‘Hannah and her Sisters’.
Woody Allen, el eskridor i el direktor del filmo ‘Midnight in Paris’, tomo este Oscar porke el senario del filmo es muy orijinal. El sujeto del filmo es sovre un eskridor mansevo ke se fue a Paris kon su espoza, i su famiya, por pasar sus vakansas i azer apaejamientos de boda. Una noche, en kaminando solo en las kalejas de Paris, su imajinasion lo transporto a los anyos 1920’s, ke era su epoka prefereda, la epoka del jazz en Paris, i los anyos ke los grandes eskridores de la literatura amerikana bivieron. El eskridor rankontro los mas grandes eskridores de la epoka, F:Scott Fitzgerald, Ernest Hemingway, i munchos otros. Este rankontro lo ayudo a avansar en su karyera, i a tomar grandes desiziones por su avenir.
El filmo irani ‘A Seperation’ gano el Oscar por ‘El Mijor Filmo en Lingua Etranjera’. ‘A Seperation’ fue el segundo filmo irani, ke fue nominado por Oscar, i el primer ke tuvo la onor de ganar este premio. Dirijado por el direktor Ashgar Farhadi, el filmo es sovre un marido i mijer ke divorsaron. El filmo esta egzaminando las tradisiones, la justisia, i las relasiones entre el ombre i la mujer en el İran moderno. Antes del de la seremonia deOscar, este filmo gano munchos premios en la Evropa, i en los Estados Unidos.
El filmo israeliano ‘Footnote’, tambien fue nominado por el Oscar del ‘Mijor filmo Etranjero’, ma fue una desepsion kuando el filmo irani lo surpaso. ‘Footnote’ es sovre un padre i ijo, i los dos siendo estudiantes de Talmud. El filmo fue dirijado por Joseph Cedar. Malgrado ke İsrael fue nominado diez vezes por el Oscar, fin agora, dainda no puido ganar el premio de Oscar. El artisto ke djugo el primer rolo, Lior Ashkenazi es nasido en una famiya sefaradi ke emigraron de la Turkiya a İsrael, en el anyo 1964. Duspues de la seremonia de Oscar, Steven Spielberg i Meryl Streep se enteresaron del filmo ‘Footnote’, i en la larga konversasion ke tuvieron kon el direktor i los artistos del filmo, les izieron komplimentos sovre el filmo, i los enkorajaron sovre sus eforsos.
La grande desepsion de la noche fue el filmo ‘Kung Fu Panda 2’. Jack Black i Dustin Hoffman tenian esperansa ke ivan a tomar el Oscar del ‘Mijor filmo de Animasion’. El filmo es sovre una panda muy godra ke gano en la kompetision de ‘high-kicking’. El objekto del filmo del filmo fue de reflektar el estado de oy, de los Premios de Akademia. Komo lo savemos todos, Dustin Hoffman es de una famiya judia, mezmo ke el no tomo dinguna edukasion judia. Jack Black es tambien de una famiya judia. Su padre se konvertio al judaizmo para pueder kazarse kon su madre. Jack Black izo sus estdios en una eskola judia.
Komo kada anyo, i este anyo munchos direktores i artistos judios fueron nominados por Oscar. Unos reusheron a tomar premios, otros no reusheron. Ma, mezmo ke todos no puedieron tomar un Oscar, se konta ke son ganadores porke no es fasil de ser nominados entre tantos filmos, direktores, i artistos.
