Una pajina de İstorya de muestra komunidad
Djueves pasado, dia de Purim, Lina Kaneti tuvo la ekselente idea de reunir en su kaza, las pokas personas ke kedaron en muestra sivdad, del primer “Grupo Esther Tani”. Fue un dia partikolar, un dia de reminisensya, de evokasyon i tambyen de konfirmasyon de esta profunda amistad ke se instala kaji syempre entre personas ke partisiparon voluntaryamente a un mizmo lavoro karitativo i partajaron el mizmo ideal ansi ke el mizmo esforso.
Tal ke fue mensyonado en el titolo de esta eskrita, estos anyos leshanos fueron una pajina de İstorya no eskrita, vyeja de mas de 50 anyos, ma ke portanto djugo un grande rolo en el renovelamyento de la Matan Baseter.
Kualo era este Grupo? i sovre todo ken era Esther Tani de bendicha memorya?
Antes de todo, eya fue (debasho la prezidensya jeneral de Jak Afnaim
A esta epoka relativamente leshana, esta kreasyon karitativa tenia komo eskopo de asegurar a los ninyos de famiyas ekonomikamente flakas, la posivilidad de pasar kada anyo, doz mezes de enverano, en una atmosfera eksepsyonal: nutrisyon abondante, banyos de mar kaji kotidyanos, paseos frekuentes, i por demazia akizisyon de uzos de punktualidad i de respekto en sus relasyones kon sus proksimos, todo lo ke se topa a la baza de una sana edukasyon.
Esto por segureo nesesitava munchas vezes largas entrevistas kon los paryentes i vijitas regolares mizmo en invyerno en las moradas de kada ninyo... Ansi Esther Tani i mas tadre todas las ke se adjuntaron a eya, entraron en un kontakto kaji fiziko kon la mizerya de la klasa sosyo-ekonomika la manko privilejyada de muestra komunidad, la kuala bivia entonses en un estado de indijensya absoluta, en kazas por la mas parte a mitad derrokadas.
Por seguro ke ya egzistia munchas otras grandes institusyones karitativas komo “el Hospital Orahaim” ,”Azilyo de los Vyejos”, “Verem”, “Orfelinato”, “Mishne Torah”, “Sedaka Umarpe”, “Gota de Leche”, “Matan Baseter de la epoka”, “Bikurholim”, i varyas otras ovras, kada una muy muy aktiva en el kampo de su programa de lavoro.
A esta epoka, (ay de esto 50 o 60 anyos), la situasyon finansyera de muestra komunidad era leshos de ser briyante ...el “Dostluk” tenia el maraviyozo uzo de distribuir paketos de komanya a unas kuantas famiyas eksesivamente menesterozas... avia padres i madres envezes analfabetos ke inyoravan las reglas elementaryas de hijyene i malorozamente envezes ninyos de un nivel intelektual muy flako, ijikas ke no savian sonriir i ke munchas vezes refuzavan de responder kuando les avlavan...
Esther Tani tuvo la idea de reunir unas kuantas amigas de edad diferente, afin de vijitar regolarmente una o dos vez kada mez, en invyerno komo en enverano, aproksimativamente 100 a 120 kazas; eya demando a sus kolavoradoras de rekojer, kada una en su propyo entorno, vestimyentas de todas dimensyones ke ya fueron utilizadas ma en buen estado i tambyen syempre kada una de sus serkanos, madre, tias, primas, marido ets..chikas mezadikas afin de pueder distribuirlas mensualmente a kada famiya.
Por seguro no era sufizyente, ma kada una de las damas azia un eforso a la dimensyon de su poder i ansi se formo el “Grupo Esther Tani”, al kual mas tadre, unos kuantos anyos despues su formasyon, en el anyo 1977, fue demandado de partisipar aktivamente, kon el apoyo inkontestavle de Naim Güleryüz i del Komite Komunitaryo de la epoka, al renovelamyento de la Matan Baseter, kon un muevo programa de ayudo a mas de 300/340 famiyas esparzidas entre Galata, Hasköy, Balat, Ortaköy i Kuzkuncuk, kon su distribusyon mensual de paketos de komanya de anyo en anyo mas rikos, i tambyen de linjeria mueva dos vezes al anyo ets...ets... ansi ke un apoyo monetaryo syempre mensual de mas a mas grande.
Muevos myembros, mujeres i ombre se adjuntaron i ainda se adjuntan a este lavoro, todos muy muy aktivos i dinamikos, ke kaji immedyatamente provaron i provan sus profundo karinyo a la funksyon ke les fue konfiada. Dezeo nombrarlos todos, ma me espanto de una defisensya de mi merorya, ansi entre munchos otros vo solo sitar los nombres de los dos primeros ke mostraron el kamino a munchos otros:”Momo Benbasat
Ansi fue echo el renovelamyento de la Matan Baseter, organizasyon de lakuala (grasyas a la jenerozidad i tambyen konsejos muy judisyozos de unos kuantos grandes donatores) nasyo el “Barınyurt”, el kual es un verdadero nido para todo modo de myembro de muestra komunidad ke se topa en estado de desmamparo, sin ningun limite de edad, mansevos i aedados en la imposivilidad de pueder giarsen solos en la vida.
Ansi se formo una grande famiya ande los vyejos devinyeron munchas vezes los dulses konsejeros de los mansevos, i los mansevos, kaji syempre espontaneamente, un apoyo fiziko para los aedados... una vida ande la kerensya remplaso la soledad.
Ansi fue el Grupo ke kreo Ester Tani. Ke su alma repoze en paz i ke el rekuerdo de su pasaje sovre tyerra sea syempre eskrito kon letras luminozas en la memorya kolektiva de muestra komunidad.
