El konkurso Festladino, ke se aze kada anyo en İsrael, es una kompetision de muzika, ande partisipan las kantikas en ladino de munchos paizes.
Festladino es un konkurso komo Eurovizion, kon la sola diferensia ke todas las kantikas son en ladino. Bulgaria, Gresia, Malta, İsrael, Turkia, Meksiko, Arjantina, Yugoslavia, Republika Cheko, Venezuela, Espanya, Portugal i Brazil son unos kuantos paizes ke partisiparon fin agora.
El konkurso Festladino, este anyo, se izo entre los ganadores de los ultimos diez anyos. En este konkurso enternasional, ke se izo en el Salon Ehal Tarbut de Rishon, en İsrael, Reneta Sibel Yolak ke partisipo al Festladino kon su kantika ‘Primer Amor’, fue la segunda ganadera de este anyo. Las palavras de la kantika fueron eskritas por Hayim Vitali Sadaka, i la muzika fue kompozada por Reneta Sibel Yolak.
Este anyo, komo el Festladino se izo entre las mas ermozas kantikas de los ultimos diez anyos, el juri ke konsistio de vente i dos personas tuvo grande difikuldad para desidar los ganadores. En el Salon Ehal Tarbut de Rishon yeno de djente, ande asistieron mas de dos mil i kinyentas personas, las diez kantikas de los ultimos anyos, fueron kantadas por ermozas kantaderas fistidas kon fostanes luksozos, en la sena dekorada kon ermozas vistas, i kon ermozas dekorasiones.
El diez del este mez, noche de Shabat, el konkurso Festladino fue transmetido en el primer kanal de la televizion de İsrael.
Reneta Sibel Yolak, la segunda ganadera de este anyo, fin agora, kompozo la muzika de kuarenta kantikas. Reneta kera kitar un album o un single, en el anyo vinidero. Aparte de esto, kere vender sus kantikas, i esta bushkando una onesta firma de muzika.
Reneta Sibel Yolak tiene munchas reushitas en munchos ramos de arte. Yolak partisipo al Festival de Eurovision en İsrael, kon las kantikas ke eya kompozo. Aparte de esto, en el anyo 2010, gano un premio en el ramo de ‘Enternasional Eskridora’. El juri del anyo 2010, ke konsistio de akademikos, eskritores i traduktores, le dieron una sertifika, i un premio de un montante de moneda. Siendo tambien un miembro de la ‘Union Enternasional de Eskritores i Muzisienes’, Reneta Sibel Yolak eskrivio kuatro livros en turko, ke estan en la lista de Best Sellers.
Aparte de su kariera komo muzisiena, eskritora, poeta, i pintora, Reneta Sibel Yolak lavoro komo profesora de inglez en la Universidad Bogaziçi, i en otros lises de Estanbol.
Oguramos a esta manseva muzisiena, artista, eskritora, i profesora, ke gane mas munchos premios, i ke sus reushitas pujen de en diya en diya.
