El 8 Marso fyestimos el dia de las mujeres en el mundo entero.
Este dia es; el aniversaryo del esforso de las mujeres, para tener los mizmos derechos kon los ombres.
La mujer ke entra a la vida de una persona, troka enteramente su vida.
Eya traye la esperansa i la alegriya.
Eyas son de vez en kuando ombro, de vez en kuando oreja, de vez en kuando una boz ke ayuda al doredor.
La mujer es kapache, tyene afeksyon, i tolerensya. Eya lucha kon los kaprichos.
Es madre, es ermana, es aliada (dost). Ser mujer es un talento de organizasyon inkreivle.
Si estimados lektores!...
Oy kero eskrivir sovre este dia presyozo.
“MADRE”!... El byervo, la nosyon primordyal de muestra egzistensya.
Todas las mujeres son una roza. Eyas kon sus eksperyensas aklaran, arrelumbren muestros kaminos, eyas mos ambezan a kerer byen el mundo, las personas i la vida, eyas aseguran muestra mirada al futuro kon esperansa i kon konfiensa.
Ken es “MUJER”?
La mujer es el monumento de fuersa (güç abidesi), es una umana ke amenaja (idare etmek) a todos en su kaza i en su famiya, es la baza de la Kerensya, Pasensya i Sakrifisyo.
La mujer en primero es una persona i despues es una madre. Todas las mujeres tyenen menester de ser amadas. No es solamente un dia al anyo ke mos akodramos de eyas i las alavamos. Syempre kale ke tengamos sentimyentos senseros i entimos.
La mujer es de natura una persona ke se enkarga (üstlenmek) todas las responsabilitades de su famiya, de su madre i padre. Es apiadosa (merhametli) i grasyoza. Rezistyente (dayanıklı), de fuerte veluntad (iradeli) i fidela (vefakar), es la baza de la famiya.
La baza de la sosyetad es la famiya. La umanidad (insanlık) ampesa kon la famiya. En la famiya la primera profesora (öğretmen) es la mujer.
Las jenerasyones ke se estan engrandesyendo kon kerensya i tolerensya son las ovras (eser) de las mujeres.
La baza de una sosyetad, es; las mujeres devuadas, produktivas (üretken) i sensivles en todo modo de espasyo en la vida.
Si una mujer es kultivada, eya puede edukar sus ijos, su famiya kon reushitad i puede venser kon sukseso todas las problemas.
Oy, las mujeres ke son madres i kompanyeras (eş), en muestra komunitad tyenen misyones (görev) emportantes. Eyas estan azyendo karyera, estan tomando desizyones para trokar sus vidas.
La mujer asegura la felisidad en la famiya kon su pueder i su sezudeza (aklı-selim).
La semana ultima fyestimos Purim en todas las keilas, las organizasyones djudias kon grande entuzyasmo, i las kriyaturas kon grande egzaltasyon.
La “Megila Ester” mos ambeza ke; las difikultades de la vida ke enkontramos son un egzamen para ayegar, para arivar a lo mas mijor, ke los detenimyentos (engel) son okazyones (fırsat) para desveloparmos.
“ESTER” la mujer istorika ke salvo un puevlo de despareserse!.... El miraklo de “PURİM”!.....
Si una mujer se metyo en tino de azer kualker koza, nada no la puede esvachear (vazgeçirmek). Eya kon toda su fuersa pena para reushir i a la fin gana.
Kuando kreyemos a muestra fuersa i a lo ke puedemos azer, kuando tenemos konfiensa (inanç) a mozos mizmo, i kuando mos konosemos, muestra vida se inche de los miraklos.
“La vida es un miraklo, ma los miraklos son los ke estan guadrados aryento de muestros korasones”.
