“Una sivilizasyon” kuala ke sea, no es solo echa de “preseptos de moralidad, kreensas, nivel del adelantamyento intelektual, patrimonyo kultural erredado de los antepasados, lingua o rituales relijyozos observados por la mayoria de un grupo”, eya es tambyen echa de la totalidad de varyos uzos i kostumbres, de su manera de bivir i igualmente de su gizado.
La semana pasada meldimos en el Şalom la anunsya de la realizasyon (myerkoles el 16 del mez de mayo) de un dia konsagrado a la kozina djudeo-espanyol, dia festivo i en mizmo tyempo kultural, organizado por el “Sentro sefarad de muestra sivdad” en kolavorasyon kon “el Barınyurt/ Matan Baseter” i “el Sentro kultural Cervantes“ en el lokal delkual avra konferansyas sovre este mizno sujeto, sigidas de un Workshop ke, el, tendra lugar en el Barınyurt.
Para mozotros todos, djudyos de la Diaspora, el rekuerdo del “Pranso Sefarad, kon sovre la meza el pishkado kon guevo i limon, el almodrote de merendjena, las tomates i pipirushkas enrenyadas a las kualas se adjusta un poko de asekura ets... platos yenos de este pasto partikolar ke tenian las komidas gizadas por muestras nonas, i sovre todo de estas golores echas kada una de multiples guezmos” mos persige i mizmo mos obseda espesyalmente kuando mos topamos leshos de la kaza familyal, lakuala bushkamos kon karinyo en la tristeza de algunos dias de soledad.
Komo lo savemos todos, “el pranso” djuga un rolo enorme en la vida de kualkyer puevlo i espesyalmente en la vida djudia... El de muestra chikes era el reflekto de la famiya rekojida al entorno de una mizma meza sovre la kuala se topava lo ke dava el Dyo, de la dulsor maternal syempre ansyoza i asegida por el dezeo de kontentar kada uno i de los konsejos paternales ke mos rekomendavan de tener syempre los kaveyos byen penyados i de ser limpyamente vestidos, porke (dezia mi nono) es un momento ande mos topamas delantre el “Bendicho sea su Nombre”...
Mizmo oy en dia, en munchas famiyas, el pranso es syempre una ora espesyal ande, en un estado de relaksasyon kaji kompleta, delantre un ermozo plato de komida i un vazo de vino o otra bevyenda, se trata de questyones graves i se puede rezolver munchos problemas... una ora ande muevas amistades pueden naser i vyejas revitalizarsen, a la favor de dos o tres palavras dulses...
El grande savyo de la antikuidad “Platon” avia situado la aksyon de una de sus ovras “le Banquet” (el banketo) al entorno de una meza ande (en imajinasyon) se topavan multiples pensadores de la epoka en la boka de los kualos el afamado filozofo grego avia metido diferentes ideas sovre el tema “Ermozura, Amor, İmmortalidad” en rezumen el ‘senso de la vida’....
El izo dezir a uno de estos savyos personajes:”la kriansa humana es mortal i imperfekta. La sola posivilidad de trespasar esta triste realidad i de alkansar a un djenero de immortalidad es “de prokrear”, “de krear” i sovre todo de “ayegar a un punto de alta sagasidad ke deshara trasas indelevles”.....
Es estranyo ke un filozofo de la dimensyon de Platon eskojga el entorno de una meza para situar una diskusyon sovre semejantes sujetos; el avia puede ser sentido la importansa de una atmosfera yena de serenidad ke puede ir , lado kon lado, kon una profunda refleksyon.
Para mozotros desendyentes de Yehuda, sovre todo kuando mos topamos en payizes ajenos, el rekuerdo de las komidas de muestra chikes es un poko komo un atadijo ke mos enkavena a muestro pasado i a muestros keridos.
