Antes unas, kuantas semanas en muestro jurnal aviyamos meldado sovre la restorasyon de la Sinagoga de Gaziantep. En esta pajina eskrivi un kurto teksto sovre la fragua. Adjusti una oja del diaryo de Joel A.Zack, arkitekto amerikano i realizador de un lavoro importante “The Istoric Synagogues of Turkey” . El, myentres su largo viyaje a traves Turkiya, tuvo un “diaryo” (günlük), ande eskrivyo sus impresyones i komentos.
Resientemente, seya en esta pajina, seya en turko meldimos kon grande plazer sovre una boda ke se selebro (despues de 40 anyos de entervalo) en la Sinagoga de Antakya. Evento relatado de la parte de envitados ke asistyeron a la “Boda”. Antes de pasar otruna vez al diaryo del Sr. Zack i meldar sus impresyones de Antakya, aki unas, dos linyas sovre la sivdad…
Antakya, Sentro de Administrasyon” de Hatay, fue konstruida en el Siglo IV a.c (m.ö) komo “Antioheia” i fue durante dekadas un importante Sentro Relijyozo para los Kristiyanos. Antakya, sivdad entre las dos oriyas del Rio Asi, aktualmente es un sentro de komercho dando sus servisyos a los lavoros agrikultural. Es tambien una sivdad istorika de grande importansa i travando muncho entereso del punto de vista turistik...
Del diaryo de J.A.Zack
2 Novembre 1996- ANTAKYA
“La ansyana sivdad de Antakya (Antioch) es serka la frontiera Siriana. Es mas serka de Yerushalayim en komparando kon su leshor a Estambol. La sivdad poseda una Komunidad de 60 djudios(*)... Arrivimos a Antakya en una tadrada de djugeves i mos dimos una chika fyesta en un restorante en la oriya de la sivdad.
Demanyana de vyernes ampesimos a travar fotografiyas de la Sinagoga entornada de una guerta. En este “kompleks” un tyempo, se topava tambien la Eskola Djudia. En la chika Sinagoga remarkimos un detalyo por lo mas “inuzual”... El Ehal es en forma de un medyo sirkolo, evokando un almaryo de vestimyentas. Se deve entrar aryento para kitar las Sefer Toras... Lo mas remarkavle es el kontenido del Ehal: “Sifrei Tora” redonda en el stil tradisyonal Sefaradi. Kada Rulo, aryento de una kuvertura de katifa (velur), Mapa adornada de plakas en plata. En estas plakas, (madalyones de Sefer Tora) se esta meldando eskriturias en ebreo...
Despues de midi sali dar un torno en la sivdad. En tornando a la Sinagoga de Antakya teniya la esperansa de topar ayi, a lo menos ocho, mueve aedados tadre de vyernes. Ma me enkanti de ver un grupo de kreentes entre 40-50 anyos i afilu mansevos en los 30... İ no solo ombres, ma tambien i mujeres.. En desparte, vide 6 ijikos meldando a boz alta, kon grande entuzyazmo...
El servisyo relijyozo estava dado por un mansevo serka los 40. Despues de la orasyon me aserki de el para suetarle el Shabat Shalom. Me rengrasyo en inglez, dezeyozo tambien de saver mi identitad. Alora le ekspliki mi lavoro, muestras bushkidades sovre las Sinagogas de Turkiya.... A mi pregunta sovre su profesyon, me respondyo ser un “Haham”. Esto me lo disho komo syendo una koza muy natural, un detalyo ke yo deviya konoser!.. Me enkanti, tanto ke le demandi komo pudiya ser ke una tan chika Komunidad tyene su propio Haham?...
Sovre mi enkanto me dyo a entender su pozisyon. En realidad este mansevo bive en Estambol, a 1000 kms leshos de Antakya. Kada djugeves despues de midi suve al otobus i aze un viaje de 22 oras para dirijar la orasyon de Shabat i dar lisyon a los chikos. Kada Alhad torna a Estambol...
Esto muy siguro ke a mi retorno a los Estados Unidos, los de aya van a ser enkantados del lavoro ke estamos azyendo aki, en Turkiya. Portanto, yo digo ke la estorya verdadera es la estorya de este ombre ke aze un tal viaje para no deshar sola esta chika Komunidad Djudia en diyas de Shabat... Este ombre ke aze un tal viaje para pueder ambezar algunos preseptos de la Tora a la mueva jenerasyon...”
(*)- Se deve konsiderar la data 1996 del diaryo. C.D.
EL SENTRO SEFARDI DE ESTAMBOL kon EL INSTITUTO CERVANTES
i la kontibusyon de EL ORFELINATO
prezentan el konsierto de
