La semana ultima tuvimos el plazer de iyirmos a Bursa kon sinkuenta mujeres volontaryas de una organizasyon, por pasar el dia i vijitar diferentes lugares enteresantes de esta sivdad ande moravan los djudyos del disejen (16) syeklo fina oy.
En los anyos 1950 biviya en Bursa kaji 4000 djudyos.
Kon tyempo se aminguaron, oy ay solamente 55-60 djudyos ke estan bivyendo aki.
En primero mos fuimos a la Sinagoga “GERUŞ” ke este byervo sinyifika en ebreo egzilado
(sürgün edilmiş). Esta sinagoga se konstruizo en 1494, es un kal de 600 anyos. Aki no se aze los funerales, solo las bodas. Ay una puerta de arko (kemerli kapı) antiguo
El espasyo prensipal esta kuvyerto kon una baza rektangular de marmol (mermer). Los asyentos de tavla (ahşap oturma yerleri) en el doredor de las paredes, i en medyo estan dispuestos (dizilmiş) en forma de serklo (daire). El “EHAL” muy diferente i antiguo. Los otros egzempyos de esta Teva se topan en la INDİA i en el MEXİCO.
A la Teva ke esta ariva, se ayega kon dos eskaleras en forma de spiral.
La “Azara” de 70
mujeres se topa ariva ande el Haham en las fyestas de Rosh-Ashana i Kipur aze la orasyon en la Teva ke esta en la azara, para ke las mujeres puedan seguir (takip etmek) estas orasyones.
La sinagoga Geruş tyene una cupula (kubbe) muy rezya (sağlam) i el edifisyo es muy byen mirado (bakımlı).
La Sinagoga”MAYOR” se konstruizo por los djudyos sefarades ke vinyeron de la isla “Mayorka” de la Espanya en 1494.
Akel tyempo la kapital del Emperyo Ottomano era “BURSA”. Es una sinagoga ande pueden orasyonar 100-150 personas. İ esta sinagoga tyene una Teva ariva komo la sinagoga Geruş. Ay una sisterna en forma de kubo (küp şeklinde) debasho la eskalera. La teva a la entrada se topa en medyo. La baza (zemin) es de marmol, i los asyentos estan en el fondo de las paredes i en el doredor de la Teva. Despues de la restorasyon esta sinagoga se avyo en el anyo 2001.
Las orasyones se aziyan en invyerno en esta sinagoga porke es mas chika i se kayenta mas presto.
En enverano es la sinagoga Geruş ke estava avyerta i oy dianda kontinua a su misyon.
Despues del anyo 2003, la sinagoga Mayor se esta utilizando para el servisyo de lavar a los muertos (ölü yıkama hizmeti).
El sinyor Elnekave kon su mujer i munchas volontaryas mos aparejaron una seuda maraviyoza i mos resivyeron kon grande entuzyasmo.
El mos konto; ke todas las kazas en el doredor de estas sinagogas eran de los djudyos. De detras de la sinogoga Geruş aviya una eskola djudiya ke se serro en el anyo 1953.
Kuando los djudyos se fueron a Israel, desharon sus kazas i izyeron donasyon a la sinagoga.
La fondasyon (vakıf) esta alkilando oy en dia estas 32 kazas i kon la moneda ke estan tomando estan reparando lo ke ay menester i estan asigurando el avenir de los kales para ke seygan byen mirados.
Despues de la vijita de las sinagogas mos fuimos a la sivdad vyeja ke es una rejyon pinyasko (kayalık bölge). Bursa es una sivdad yena de murayas (surlar), ande ay munchos banyos turkos (hamam) i banyos termales (kaplıca). Despues ke eskapimos los empleos en el çarşi, esharpas de seda i otras kozas mos metimos al kamino para iyirmos a un kazal ke es nombrado “Cumalıkızık köyü”.
Un kazal de 700 anyos ke no peryo el teshido historiko (tarihi doku), ande las kazas son muy vyejas, kazas de pyedra, de tavla ke se konstruizaron kon tres etajes, kazas otantikas, kalejas muy estrechas, munchas fuentes, i las aguas koryendo de la montanya “Uludağ” fina abasho komo rios (dere). Komo ay muncha agua todo muy limpyo, los arvoles, las vedruras i el aver djusto lugar para deskansarse. Bevimos çay i kafe i komimos dulsuryas i salados en la guerta del kazal yeno de arvoles i de rozas.
La emportansa de este kazal es; ke oy mizmo estamos puedyendo ver las kazas otantikas de la arkitektura Ottomana de antes 700 anyos.
Mos espartimos kon regreto para pueder tornar a muestras kazas.
Fue un dia muy reushido, yeno de kerensya, kultura i amistad.
En kada paseo la persona tyene kozas muevas de ambezarse.
Estaremos sanos i rezyos para pueder partisipar a otros paseos kon todos endjuntos.
