Komo lo meldi tekstualmente en la gazeta « Le Figaro » (uno de los mas seryozos diaryos fransezes) Myerkoles pasado el 23 del mez koryente, una manifestation de moradores djudyos de un baryo popular de Tel Aviv ke protestavan kontra la prezensya en Israel de imigrantes illegales afrikanos, provoko malorozamente insidyentes violentes ke disgustaron mizmo la opinyon Israelyana.
Magazenes estranjeros fueron sakeados i munchas personas de provenansya afrikana fueron molestadas en el baryo Hatikva.
La manifestasyon empeso,al empesijo kalmamente, kon la partisipasyon de unos kuantos deputados del Likud, en el eskopo de reklamar la ekspulsyon de los imigrados klandestinos, ma despues poko tyempo eya se deteryoro i troko kaji en un djenero de asalto ; un djornalisto i un ‘militante İsraelyano de los derechos del ombre’ ke kritikavan sovre sus pasaje fueron agresados , las violensas se propajaron rapidamente, botikas apartenyendo a proprietaryos de orijen etiopyana i eritreana fueron sakeadas, otomobilistos afrikanos fueron atakados i un minibus fue golpeado…
La polisia parvino a arrestar unos kuantos de los asaltantes implikados partikularmente en estas violensas.
El fakto es ke la imigrasyon klandestina a partir de la Afrika i espesyalmente de la Eritrea i del Sudan pujo muncho en el korso de los ultimos anyos. Israel syendo uno de los muy raros payizes desvelopados de la rejyon, aksesivle por kamino de tyerra , munchos de estos emigrantes pasan la frontyera kaji dezertika kon el Sinay Ayiftsyano.
Aktualamente, ay en Israel aproksimativamente 60.000 imigrantes en kondisyon illegal; munchos de entre eyos biven en una situasyon de provedad inimajinavle, algunos durmen en la kaye i en espasyos publikos . Munchos İsraelyanos los akuzan de una pujita de la kriminalidad en el payis, asta krear una atmosfera de psikoz kolektiva.
El Ministro del İnteryor Eli Yishay myembro del partido ortodokso Sefarad Shass, reklamo la arrestasyon i la ekspulsyon de todos los migrantes illegales.El dize ke “kale meterlos en sentros de detensyon i mandarlos a sus payiz de orijen, porke tambyen toman el lavoro de los Israelyanos i ke kale protejer el karakter djudyo de Israel “.(fin del rezumen de lo ke meldi en la Prensa)
A primera lektura, tyene probablemente razon, el ministro del interyor. Ma, las palavras “meterlos en sentros de detensyon’’ en la boka de un responsavle djudyo tyenen un sonido estranyo, i mizmo trajiko.
Ainda 70 anyos antes, muestros ermanos evropeos konosyeron estos sentros de konsentrasyon. Si... aktualmente no es el mizmo kavzo ni (en ninguna manera) la mizma intisyon de la parte de los dirijentes Israelyanos, portanto esto no impede ke eyos se topan delantre un dolorozo dilema kaji inekstrikavle.
Ay en este momento, mas o menos en el mundo entero, una terrivle ambivalensya ke krea una lucha kruela entre dos valores igualmente importantes: de una parte, el instinkto de konservasyon, el ‘Self defense’ komo dizen los inglezes. I de la otra, muestro dover de humanos enverso los ‘Otros’ , enverso muestros semblavles no djudyos ke se topan en estado de terrivle prekaridad, kondenados, la mas parte del tyempo, a sufriensas inadmisivles .
Enforterser la frontyera kon el Ayifto afin de no permeter muevas intruzyones de migrantes afrikanos es mas ke dezeavle, kaji un dever imperyozo enverso si mizmo de la parte de Israel…Ma, ke azer de los ke ya estan desde un syerto tyempo en el payis, en pozisyon legal o illegal ? Es ke un Estado Djudyo tyene el derecho moral de arrondjar los ke le demandan refujyo? Es ke no seria mas serka de la Ethika Biblika, de retenerlos debasho fuertes kondisyones de buena kondukta, aprendisaje de la lingua ansi ke de los uzos i kostumbre del payis, i inisyarlos a kualkyer ofisyo de mano ke les permetra de ganar honestamente sus pan kotidyano? sin mankar de skolarizar los ninyos afin de asegurar sus integrasyon armonyoza.
Ke mos dizen los profetas, verdaderos mensajeres de muestra fey ?
“Kuando segaras la rekolta de tu kampo, desharas un pedaso intakto, no rekojeras lo ke kedara embasho…deshalo para el prove i el estranjero (Veyikra- Levitikus )
“Ama tambyen el estranjero, dandole pan i vestido…Amaras el Estranjero porke fuites estranjero en tyerra de Ayifto’’
(Devarim/ Deuteronomo).
Estranya epoka ke la muestra ande, munchas vezes el benadam no save egzaktamente ke kamino tomar , epoka de insertitud i dubyo, ma tambyen de promesas luminozas de adelantamyento.
